ԱԱԾ-ի կողմից հետախուզվող նախկին քաղաքապետը Գագիկ Բեգլարյանն է

Ազգային անվտանգության ծառայությունը քիչ առաջ տեղեկացրեց, որ Երևանի նախկին քաղաքապետերից մեկը յուրացրել է առանձնապես խոշոր չափերով անշարժ գույքը՝ 233.470.000 ՀՀ դրամ արժողությամբ: Խոսքը Երևանի Թամանյան փողոցում գործող մանկապարտեզի մասին է:
Հաղորդագրության մեջ նշված է, որ տվյալ պաշտոնյան 2009 թ. մարտի 16-ին, զբաղեցնելով Երևանի քաղաքապետի պաշտոնը, հանցավոր մտադրությունն ավարտին հասցնելու նպատակով, իր որոշմամբ փոփոխել է դրա 228.3 քմ. մակերեսով տարածքի գործառնական նշանակությունը և այն ընդգրկել է ոչ բնակելի ֆոնդում՝ որպես հասարակական սպասարկման տարածք։ Դրանից հետո, նշված անշարժ գույքը ակնհայտ անհամարժեք հատուցմամբ՝ ընդամենը 23.120.000 ՀՀ դրամով, օտարվել է, իսկ 2011 թ. փետրվարի 2-ին առուվաճառքի պայմանագրով 24.000.000 ՀՀ դրամով գրանցվել է հիշյալ պաշտոնյայի հոր անվամբ, այնուհետև, կտակի ժառանգության իրավունքի վկայագրի համաձայն՝ վերագրանցվել է որպես որդու սեփականություն:

Ելնելով ներկայացված այս տեղեկատվությունից՝ խոսքը Գագիկ Բեգլարյանի՝ Չոռնի Գագոյի մասին է, քանի որ նրա կենսագրական տվյալներից տեղեկանում ենք, որ նշյալ ժամանակահատվածում նա է եղել Երեւանի քաղաքապետը: Բեգլարյանը 2009 թվականի մարտի 4-ին ՀՀ Նախագահի հրամանագրով նշանակվել է Երևանի քաղաքապետ: Ստացվում է, որ նշանակվելուց ընդամենը օրեր անց նա արդեն ձեռնամուխ է եղել սեփական շահերի սպասարկմանը։

Գագիկ Բեգլարյանն այժմ հետախուզման մեջ է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Նարեկ Կիրակոսյան