17.11.2024 | 23:31
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
Ռոբերտ Քոչարյանն ու Գագիկ Խաչատրյանը դեռ հիվանդանոցում են․ ՔԿՀ չեն տեղափոխվել
Հասարակություն
20.03.2020 | 12:00
Մարտի 9-ից «Էրեբունի» բժշկական կենտրոն տեղափոխված Հայաստանի երկրորդ նախագահ, Մարտի 1-ի գործով Սահմանադրական կարգի տապալման համար մեղադրվող Ռոբերտ Քոչարյանը մինչ օրս հիվանդանոցում է գտնվում։ Տեղեկությունը Factor.am-ի հետ զրույցում հաստատեցին ՔԿԾ մամուլի ծառայությունից։
Ավելի վաղ տեղեկացել էինք, որ նրա մոտ գրանցվել էր ճնշման տատանում, իսկ թե ինչու է մինչ օրս գտնվում բժշկական հսկողության տակ՝ հայտնի չէ։
Նշենք, որ փաստաբանները չէին բացառել, որ այս երեքշաբթի, եթե կայանար Քոչարյանի և մյուսների գործով դատական նիստը, երկրորդ նախագահը ևս կմասնակցեր դրան։ Նիստը, սակայն, ինչպես գիտեք, չկայացավ․ դատավորը վատառողջ էր։
ՔԿՀ-ում չէ նաև մեկ այլ նախկին բարձրաստիճան պաշտոնյա։ Խոսքը պաշտոնեական դիրքի չարաշահման և խոշոր չափերի վատնման համար մեղադրվող Պետեկամուտների կոմիտեի (ՊԵԿ) նախկին նախագահ, Ֆինանսների նախկին նախարար Գագիկ Խաչատրյանի մասին է։
Փետրվարի 11-ին նա տեղափոխվել էր «Աստղիկ» բժշկական կենտրոն և մինչ օրս էլ գտնվում է այնտեղ։ Խաչատրյանի պաշտպանների պնդմամբ՝ նրա մոտ արձանագրվել է հիվանդությունների սրացում։
Լիլիթ Շաբոյան
