18.10.2026 | 13:43
Օդի ջերմաստիճանը կնվազի
ԵՄ-ն 30 օրով փակեց արտաքին սահմանները
Քաղաքականություն
18.03.2020 | 17:09
Կորոնավիրուսի հետագա տարածումը կանխելու նպատակով Եվրամիությունը 30 օրով փակում է արտաքին սահմանները: Euronews-ի փոխանցմամբ՝ նման որոշում է ընդունվել Եվրահանձնաժողովի և Եվրախորհրդի համատեղ նիստում:
«Բոլոր պետությունները լիարժեք աջակցեցին մեզ, որոշման կիրարկումը դրված է ԵՄ անդամ պետությունների համապատասխան ծառայությունների վրա: Որոշումն ուժի մեջ է մտնում անհապաղ»,- մեկնաբանել է ԵՀ ղեկավար Ուրսուլա ֆոն դեր Լյայենը:
Նշվում է, որ ԵՄ պատմության մեջ աննախադեպ այս միջոցառումներին համաձայնել են նաև Ֆրանսիայի և Գերմանիայի իշխանությունները: Գերմանիայի կանցլեր Անգելա Մերկելը նշել է, որ հարկավոր է համատեղել ջանքերը՝ «միության սահմաններից դուրս գտնվող ԵՄ անդամ բոլոր պետությունների քաղաքացիներին հայրենիք վերադարձնելու ուղղությամբ»:
Այսօրվանից Ֆրանսիայում 135 եվրոյի չափով տուգանք է սահմանված նրանց համար, ովքեր առանց ծայրահեղ անհրաժեշտության դուրս կգան բնակարաններից: Խիստ կարանտինային միջոցներին հետևելու են 100 հազար իրավապահներ, ինչպես նաև զինվորական պարեկներ: Նման իրադրություն է նաև Իսպանիայում:
Հավելենք, որ Եվրամիությունում ուժի մեջ մտած մուտքի և ելքի վերահսկողության հետ կապված՝ արդեն իսկ տասնյակ ուղևորատար և բեռնատար տրանսպորտային միջոցներ են կուտակվել սահմաններին:
