Մի քանի ավիաընկերություններ կկրճատեն չվերթների հաճախականությունը Հայաստան

«Զվարթնոց» օդանավակայանում բոլոր նախատեսված չվերթները բնականոն հունով իրականացվում են, սակայն կան նախապես չեղարկված որոշ չվերթներ։

Այս մասին Factor.am-ի հետ զրույցում տեղեկացրեց «Արմենիա» միջազգային օդանավակայններ ընկերության հանրային կապերի պատասխանատու Սաթենիկ Հովհաննիսյանը. «Երևան-Թել Ավիվ-Երևան չվերթները, Երևան-Լիոն-Երևան, Ryan air-ի բոլոր չվերթները նախապես չեղարկվել են, իսկ մնացածներն իրականացվում են ըստ չվացուցակի։ Կան նաև մի քանի ավիաընկերություններ, որոնք նախատեսում են կրճատել չվերթների հաճախականությունը կոմերցիոն բնույթից ելնելով․ Qatar airways, Fly Dubay,  Belavia, Pegas Fly ընկերությունները իրենց ցուցակներում ճշգրտումներ են իրականացնում»։

Ընկերության ներկայացուցչի խոսքով՝ ուղևորահոսքի նվազում կանխատեսվում է, սակայն այժմ հաշվարկված տվյալներ չունեն։

Ինչ վերաբերում է Հայաստան եկող չվերթների հետ կապված հատուկ միջոցառումներին, Սաթենիկ Հովհաննիսյանը նշեց, որ առայժմ միայն Իտալիայից եկող չվերթների դեպքում են դրանք իրականացվել, սակայն չի բացառվում, որ անհրաժեշտության դեպքում հատուկ միջոցառումներ սահմանվեն նաև մյուս չվերթներով եկող ուղևորների համար։

Նշենք, որ չվերթների փոփոխությունները կապված են Չինաստանում սկիզբ առած և տարբեր երկրներ ներթափանցած կորոնավիրուսի տարածման հետ։ Սաթենիկ Հովհաննիսյանի խոսքով՝ այս քայլը կոմերցիոն բնույթ է կրում։

Մինչ այժմ Հայաստանում արձանագրվել է  Չինաստանում սկիզբ առած կորոնավիրուսի 30 դեպք։

Անժելա Պողոսյան