Ռոբերտ Քոչարյանի վիճակը կայուն է, բայց անհայտ է, թե հիվանդանոցից երբ դուրս կգրեն

«Մարտի 1»-ի գործով մեղադրյալ, երկրորդ նախագահ Ռոբերտ Քոչարյանը շարունակում է ստացիոնար բուժումը «Էրեբունի» բժշկական կենտրոնում: Նրա առողջական վիճակը կայուն է: Այս մասին Factor.am-ի հարցին ի պատասխան ասաց Էրեբունի ԲԿ տնօրեն Միքայել Մանուկյանը՝ նշելով, որ առայժմ անհայտ է, թե երբ կավարտվի Քոչարյանի  ստացիոնար բուժումը:

Ռոբերտ Քոչարյանն արդեն 8 օր է, ինչ ԱԱԾ մեկուսարանում չէ:

Հիշեցնենք, որ Քոչարյանի գրասենյակը մարտի 7-ին տեղեկացրել էր, որ ուշ երեկոյան արյան ճնշման կտրուկ տատանման և ինքնազգացողության վատացման պատճառով Ռոբերտ Քոչարյանը տեղափոխվել է «Նաիրի» բժշկական կենտրոն: «Նաիրի» բժշկական կենտրոնի տնօրեն Անատոլի Գնունին էլ Factor.am-ին փոխանցել էր, որ Ռոբերտ Քոչարյանը մարտի 8-ին տեղափոխվել է «Էրեբունի» ԲԿ:

Իսկ ահա Մանվել Գրիգորյանի առողջական վիճակը շարունակում է մնալ ծանր: Սակայն փետրվարի 26-ին «Նաիրի» բժշկական կենտրոնի տնօրեն Անատոլի Գնունին Factor.am-ին փոխանցել էր, որ Գրիգորյանը հրաժարվել է ստացիոնար բուժումից և գնացել է տուն: Այսօր Անատոլի Գինունին Factor.am-ին ասաց, որ հիվանդանոցից գնալուց հետո Գրիգորյանը ոչ մի անգամ չի դիմել իրենց, իսկ մի քանի օր առաջ իրեն զանգել է Մանվել Գրիգորյանի կինը և ասել, որ վերջինիս վիճակը գնալով վատանում է:

«Գնալուց առաջ ասեց, որ չի կարողանում դիմանա հիվանդանոցային պայմաններին, քանի որ մեկ տարուց ավել եղել է հիվանդանոցում: Կինն է զանգել, ներկայացրել է խնդիրները, որ նստած է քնում, ես անձամբ չեմ տեսել, կինն ասում է, որ նստած է քնում: Առաջարկել ենք, որ բերեն հիվանդանոց, բայց հրաժարվել է, ասել է՝ որքան ապրեցի, ապրեցի: Նրա վիճակը խրոնիկ ծանր է, իր շաքարը միշտ եղել է 25-30-ի սահմաններում»,- ասաց «Նաիրի» ԲԿ-ի տնօրենը:

Նարեկ Կիրակոսյան