ԵՐԵՎԱՆԻ ԺԱՄԱՆԱԿՈՎ. Սա մեծ քննություն է մեր իշխանության համար. Կարինե Խոդիկյան. ՏԵՍԱՆՅՈՒԹ

«Հանրաքվե անցկացնելն այս պահի համար լավագույն որոշումն էր: Ամեն դեպքում, սահմանադրական փոփոխությունները պետք է ավելի վաղ արվեին, չարվեց, այդ պատճառով էլ եկանք-հասանք այս օրվան: Այն, ինչ կարող էր Ազգային ժողովն անել մեկ տարի առաջ և ընկալվել, այսօր արդեն կարող էր չընկալվել, ուստի հանրաքվե անցկացնելու որոշումը ճիշտ էր»,- Factor TV-ի «Երևանի ժամանակով» զրուցաշարի շրջանակում տեսակետ է հայտնում դրամատուրգ, արձակագիր Կարինե Խոդիկյանը:

Նա հակադարձում է քննադատների այն պնդմանը, թե հանրաքվեի անցկացման համար մեծ և ուռճացված ծախսեր են արվելու. «Հանրաքվեի ծախսերի մասին հիմնականում աղմուկ են բարձրացնում մարդիկ, որոնց գործուն մասնակցությամբ ժամանակին միլիոններ են անհետացել: Ինքս հարկատու եմ, և եթե չեմ դժգոհում, մյուսները թող լռեն»:

Դրամատուրգը հիշեցրեց՝ տարիներ շարունակ դժգոհել է այն հանգամանքից, որ իշխանավորները, հատկապես՝ առաջին դեմքերը, դուրս չէին գալիս ժողովրդի մեջ:

«Բայց մեր վարչապետն օժտված է հրաշալի այդ հատկանիշով. նա ժողովրդի հետ շփվելու առիթը բաց չի թողնում»,- նկատում է տիկին Խոդիկյանը:

Մեր զրուցակիցն անդրադառնում է նաև Նիկոլ Փաշինյանի՝ կուրթանցի Մեխակից ներողություն խնդրելու դեպքին և դրան նախորդած քննադատություններին՝ ուղղված վարչապետի հասցեին. «Մեր խեղճ ժողովուրդը տասնյակ տարիներով չէր լսել, որ երկրի ղեկավարը ներողություն խնդրեր, ուստի իր ամբողջ մուռը հանեց Նիկոլ Փաշինյանից: Իհարկե, վարչապետը ներողություն խնդրելով հերոսություն չարեց. նա պարտավոր էր դա անել, բայց կեցցե, որ կարողացավ զգալ իր սխալը»:

Տիկին Խոդիկյանը խոսում է նաև Հայաստանում կորոնավիրուսի դեպքերի մասին, կոչ անում խուճապի չմատնվել, բայց լինել սթափ. «Խուճապ է, քանի որ հանկարծ պարզվում է՝ կա վիրուս, որի հակավիրուսը մենք չունենք: Սա մեծ քննություն է մեր իշխանության համար, հատկապես Առողջապահության նախարարության և այն կառույցների համար, որոնք առաջին պատասխանատուներն են»:

Աննա Բաբաջանյան