17.04.2026 | 22:07
Հայաստանի մի շարք հասցեներում էլեկտրաէներգիայի անջատումներ կլինեն
Կորոնավիրուսի առաջ բոլորը հավասար են․ հայտնիներ, որոնք վարակվեցին COVID-19-ով. ՏԵՍԱՆՅՈՒԹ
Քաղաքականություն
13.03.2020 | 21:58
Շուրջ 140 հազար վարակակիր ու 5.100-ից ավելի մահացության դեպք։ Նոր տեսակի կորոնավիրուսն առայժմ նահանջելու միտում, կարծես, չունի։
Վարակակիրների թվում հայտնվել են ինչպես շարքային քաղաքացիներ, այնպես էլ քաղաքական գործիչներ, մարզիկներ, շոու բիզնեսի ներկայացուցիչներ։
Երեկ հայտնի դարձավ, որ կորոնավիրուս է հայտնաբերվել ամերիկացի դերասան, պրոդյուսեր Թոմ Հենքսի և նրա կնոջ՝ դերասանուհի Ռիտա Ուիլսոնի մոտ։ Դերասանն այդ մասին տեղեկացրել է Ինստագրամի իր միկրոբլոգում։ Նա գրել է, որ իր և կնոջ ինքնազգացողությունը վատացել է, մրսածություն են ունեցել, մարմնի ցավ և թեթև տենդ: Կասկածները փարատելու համար կորոնավիրուսի թեստ են հանձնել և արդյունքը դրական է եղել։ Կորոնավիրուսի վարակակիրների շարքում է հայտնվել նաև Բրազիլիայի նախագահ Ժաիր Բոլսոնարուն։ Նա կորոնավիրուսի ևս մեկ թեստ է անցել և սպասում է ախտորոշման վերջնական պատասխանին։ Երեկ էլ տեղեկություն էր տարածվել, որ վիրուսով վարակվել է նաև նրա մամուլի քարտուղար Ֆաբիո Վայնգարտենը։
Ամերիկյան Բասկետբոլի ազգային ասոցիացիայի՝ NBA-ի «Յուտա Ջազ» ակումբի բասկետբոլիստ Ռուդի Գոբերի կորոնավիրուսի թեստը երեկ նույնպես դրական է եղել։ Գոբերի վարակի հաստատումից հետո NBA-ը հայտարարություն է տարածել՝ նշելով, որ կանոնավոր առաջնության խաղերն անժամկետ հետաձգվում են:
Հետաքրքիր է, որ վարակվելու մասին տեղեկանալուց առաջ բասկելտբոլիստը մամուլի ասուլիսի ընթացքում հումորով անդրադարձել է կորոնավիրուսի թեմային և դիտմամբ ձեռք տվել ասուլիսին ներկա լրատվամիջոցների բարձրախոսներին՝ իբր վարակելով դրանք:
Այսօր կորոնավիրուսի դեպք է հաստատվել նաև Լոնդոնի «Չելսիի» 19-ամյա հարձակվող Կալում Հադսոն-Օդոյի մոտ։ «Չելսիի» ողջ անձնակազմն ինքնամեկուսացվել է։
«Յուվենտուս» ֆուտբոլային ակումբի պաշտպան Դանիել Ռուգանին նույնպես կորոնավիրուսի վարակակիրների թվում է։ Ինչպես նա, այնպես էլ նրա հետ շփում ունեցած մարզիկները մեկուսացված են։
Այսօր առավոտյան հայտնի դարձավ, որ կորոնավիրուսով վարակվել է Կանադայի վարչապետ Ջասթին Թրյուդոյի կինը։ Սոֆի և Ջասթին Թրյուդոներն ինքնամեկուսացել են: Կանադայի վարչապետը որևէ նախանշան չունի, սակայն դեռ 14 օր մեկուսացված կմնա:
Կորոնավիրուսի պատճառով երեկվանից կարանտինի մեջ են Նորվեգիայի թագավորն ու թագուհին։ Նշում է, որ կառավարության ուրբաթօրյա նիստը թագավորը տեսակապի միջոցով կանցկացնի։
Մի շարք երկրներում կորոնավիրուսի հաստատված դեպքեր են գրանցվել նաև գերատեսչությունների ղեկավարների մոտ։ Դրանց թվում է Մեծ Բրիտանիայի առողջապահության նախարարը, Ավստրալիայի ՆԳ նախարարը, Ֆրանսիայի մշակույթի նախարարը, Իրանի փոխնախագահը, Զբոսաշրջության, մշակութային ժառանգության և արհեստների նախարարը, ինչպես նաև առևտրի և արդյունաբերության նախարարը։
