17.09.2026 | 23:38
Սամվել Կարապետյանի տնային կալանքը երկարաձգվել է
Էջմիածնում դպրոցի բուժքույրը կորոնավիրուսի կասկածով մեկուսացվել է. նա շփվել է աշակերտների հետ
12.03.2020 | 15:48
Էջմիածնի Խ.Աբովյանի անվան թիվ 4 դպրոցի բուժքույրը մեկուսացվել է կորոնավիրուսի կասկածանքով։
Factor.am-ի հետ զրույցում տնօրեն Արուսյակ Մուրադյանն ասաց՝ բուժքույրը կիրակի նշանադրության արարողության է մասնակցել, որտեղ եղել է կորոնավիրուսով վարակված անձ։ Դրանից հետո նա 3 օր եկել է դպրոց, կատարել է բուժքրոջ պարտականությունները, շփվել երեխաների, կոլեկտիվի մյուս անդամների հետ։
«Այսօր եկավ, ինձ տեղեկացրեց, որ կորոնավիրուսի կասկածով պետք է մեկուսացվի, և դպրոցի մուտքից էլ հետ գնաց»,- նշեց տնօրենը։
Վերջինի խոսքով՝ այսօր բացակայությունները շատ են եղել, աշակերտների շուրջ 50 տոկոսը բացակայել է։
«Ջրծաղիկով հիվանդ 10-12 աշակերտ ունենք, որոնց մի մասն արդեն առողջացել, վերադարձել է: Դպրոցն ունի 1.229 աշակերտ, որոնցից առաջին հերթով դպրոց է հաճախում 992-ը: Ծնողները, իմանալով իրավիճակի մասին, եկան, երեխաներին տուն տարան: Այս պահին մնացել է միայն 10-12 աշակերտ»,- նշեց Արուսյակ Մուրադյանը։
Հիշեցնենք, որ մարտի 11-ին Հայաստանում կորոնավիրուսով վարակման ևս 3 նոր դեպք է գրանցվել: Նրանցից մեկը Էջմիածին քաղաքի բնակիչ է, որը մարտի 8-ին մասնակցել է նշանադրության արարողության: Այսպիսով, ընդհանուր առմամբ, մեր երկրում կորոնավիրուսով վարակվածների թիվը 4-ն է:
