Ինչպե՞ս կարող է ժողովրդի կարծիքը հարցնելը լինի անօրինական. Արամ Սարգսյան. ՏԵՍԱՆՅՈՒԹ

«Հանրապետություն» կուսակցության առաջնորդ Արամ Սարգսյանն Ագարակում միացել է «Այո»-ի քարոզարշավին։ Factor.am-ի հարցին՝ որո՞նք են այն փաստարկները, ըստ որի քաղքացիները պետք է «Այո» ասեն սահմանադրական փոփոխություններին, Արամ Սարգսյանը պատասխանեց. «Դա շատ պարզ խնդիր է, ժողովուրդը ոտքի է կանգնել և նախորդ իշխանությանն ասել է՝ հեռացեք, հեռացել է գործադիր իշխանությունը, հեռացել է օրենսդիր իշխանությունը, հիմա ժողովուրդն ասում է, որ դատական իշխանությանը չի վստահում, նրանք էլ պիտի հեռանան»։

Արամ Սարգսյանը համաձայն չէ հնչող կարծիքներին, որ այս հանրաքվեն անօրինական է: «Ես չեմ հասկանում՝ ինչպես կարող է ժողովրդի կարծիք հարցնելը լինել անօրինական։ Ավելի օրինական բան ինձ համար, քան ժողովրդի կարծիքը հարցնելն է, ես չեմ պատկերացնում»,- ասաց նա։

Դիտարկմանը, թե կարծիքներ կան, որ Հրայր Թովմասյանի հետ ներկայիս իշխանությունները հաշտ էին, մինչև ՀՀ երկրորդ նախագահ, Մարտի 1-ի գործով մեղադրյալ Ռոբերտ Քոչարյանի գործը վարույթ ընդունելը, Արամ Սարգսյանն արձագանքեց. «Գիտեք՝ Սերժ Սարգսյանին մերժելուց հետո ԱԺ-ի հետ էլ էր հաշտ այս իշխանությունը, ի՞նչ, չփոխե՞ր Ազգային ժողովը։ Սա հեղափոխությո՞ւն էր, թե՞ ուղղակի իշխանափոխություն»։

Հիշեցնենք, որ ապրիլի 5-ին նախանշված է սահմանադրական փոփոխությունների հանրաքվեն։ Առաջարկվում է 2015 թվականի դեկտեմբերի 6-ին փոփոխված Սահմանադրության 213-րդ հոդվածը շարադրել նոր խմբագրությամբ և ներկայացնել այսպես. «Մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է»:

Մանրամասները՝ տեսանյութում: