12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
«Այս Սահմանադրական դատարանը պետք է հեռանա». վարչապետ. ՏԵՍԱՆՅՈՒԹ
Քաղաքականություն
10.03.2020 | 11:41
Այսօր Հայաստանում կան մարդիկ՝ ժողովրդի կողմից մերժված, ովքեր մտածում են, որ ժամանակին իրենց շահերը պաշտպանելու համար ստեղծել են Սահմանադրական դատարան, տվել են անսահմանափակ լիազորություններ, հիմա կարող են սպասել հարմար պահի, որ այդ դատարանն իրենց համար կայացնի բարենպաստ որոշումներ։ Ագարակում «Այո»-ի քարոզարշավի ժամանակ այս մասին հայտարարեց ՀՀ վարչապետ Նիկոլ Փաշինյանը:
«Չի կարող լինել այդպիսի բան, որովհետև չի կարող լինել Սահմանադրական դատարան, ՀՀ-ում որևէ մարմին, որ վեր է ժողովրդից։ Մենք այսօր այս հանրաքվեով ևս մեկ անգամ վերահաստատելու ենք դա, որ բոլորի համար մեկընդմիշտ պարզ լինի՝ ՀՀ-ում իշխանությունը պատկանում է ժողովրդին»,- նշեց Փաշինյանը։
Նրա խոսքով՝ Սահմանադրական դատարանը տարիներ շարունակ ընտրակեղծիքների համար տանիք է եղել. «Սահմանադրական դատարանի հարցը նաև այդ պատճառով է դրված։ Ես բազմիցս նշել եմ, որ ՀՀ-ում բոլոր պրոբլեմները սկսվել են ընտրությունները կեղծելով և ՍԴ-ն, ըստ էության, դարձել է տանիք բոլոր ընտրակեղծիքների համար։ Մենք ասում ենք, որ Սահմանադրական դատարանը պետք է փոխվի և պետք է լինի ՀՀ գործող Սահմանադրությանը համապատասխան Սահմանադրական դատարան»։
Հիշեցնենք, որ ապրիլի 5-ին նախանշված է սահմանադրական փոփոխությունների հանրաքվե: Առաջարկվող փոփոխություններով՝ 2015 թվականի դեկտեմբերի 6-ին փոփոխված Սահմանադրության 213-րդ հոդվածը շարադրել նոր խմբագրությամբ և ներկայացնել այսպես. «Մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է»:
Մանրամասները՝ տեսանյութում:
