Նա Ադրբեջանի զինվորն է Ֆրանսիայում. Մուրադ Փափազյանը՝ Փարիզի քաղաքապետի թեկնածու Ռաշիդա Դաթիի մասին

Փարիզի քաղաքապետի թեկնածու առաջադրված Ռաշիդա Դաթին, որը ներկայում Փարիզի 7-րդ շրջանի քաղաքապետն է, շատ մտերիմ կապեր ունի Ադրբեջանի հետ: Factor.am-ի հետ զրույցում այս մասին ասաց Ֆրանսիայի հայկական կազմակերպությունները համակարգող խորհրդի (CCAF) համանախագահ Մուրադ Փափազյանը:

«Եվ ոչ միայն պետության, այլ նաև Ալիևների հետ անձնական կապեր ունի, որոնք քաղաքականացրեց: Ռաշիդա Դաթին փաստեց, որ նաև Ադրբեջանի քաղաքական բարեկամն է: Նա հանդես է եկել մի քանի նախաձեռնություններով՝ քաղաքականապես զորավիգ կանգնելով Ադրբեջանին, Եվրախորհրդարանում միշտ քվեարկել է ի նպաստ Ադրբեջանի և Հայաստանի դեմ, ապրիլյան պատերազմից հետո էլ զորավիգ կանգնեց Ադրբեջանին՝ դատապարտելով հայկական կողմին: Դաթին Ադրբեջանի զինվորն է Փարիզում և Ֆրանսիայում»,- հայտարարեց Մուրադ Փափազյանը:

Նա նշեց, որ Փարիզի քաղաքապետի ընտրություններում, որոնք տեղի են ունենալու մարտի 15-ին և 23-ին, Ռաշիդա Դաթին ընտրվելու բավական մեծ հնարավորություններ ունի:

«Աջերը, որոնք պարտվեցին 2017 թվականի նախագահական ընտրություններում և այդ պաշտոնը զբաղեցրեց Էմաուել Մակրոնը, այսօր ցանկանում են ռևանշ անել և Փարիզը գրավել: Դաթիին լուրջ աջակցություն է ցուցաբերում նաև նախկին նախագահ Նիկոլա Սարկոզին»,- հավելեց CCAF-ի համանախագահը:

Մուրադ Փափազյանի խոսքով՝ քարոզարշավի ընթացքում Դաթին խուսափում է ներկայացնել Բաքվի հետ մերձավոր բարեկամությունը, փորձում է թաքցնել այն. «Բայց Ֆրանսիայի ազդեցիկ հայկական կազմակերպությունները բարձրաձայնում են իրականությունը, փորձում հանրությանը ներկայացնել, որ եթե Դաթիին քվե տաք, նշանակում է՝ Ադրբեջանին եք քվե տալիս: Փորձում ենք այդ պայքարը տանել, որպեսզի հանրային կարծիքի մեջ կասկած մտցնենք»:

Փարիզի քաղաքապետի ընտրություններում իր թեկնածությունն է առաջադրել նաև գործող քաղաքապետ Անն Իդալգոն, որը, ինչպես հայտնի է, սերտ հարաբերություններ ունի տեղի հայ համայնքի հետ:

«Մենք աջակցում ենք գործող քաղաքապետ Անն Իդալգոյին: Նա միշտ մասնակցել է հայկական նախաձեռնություններին, զորավիգ է եղել հայ համայնքին, Հայաստանին ու Արցախին, կազմակերպում և մասնակցում է Հայոց ցեղասպանության տարելիցի միջոցառումներին: Նրա նախաձեռնությամբ է նաև, որ «Թումո»-ն Փարիզ եկավ»,- թվարկեց Մուրադ Փափազյանը:

Նշելով, որ Անն Իդալգոն և Ռաշիդա Դաթին Փարիզի քաղաքապետի ընտրություններում հաղթանակի հավասար հնարավորություններ ունեն՝ Մուրադ Փափազյանը փաստեց, որ մեծ աշխատանք կա անելու և շատ դժվար ընտրապայքար է սպասվում վերջին օրերին:

Թամարա Հակոբյան