29.06.2026 | 13:37
Ինչո՞ւ եք 4 օր անց արձագանքել ժամը 20-ից հետո ընթացող քվեարկություններին․ ՍԴ դատավորը՝ ԿԸՀ նախագահին․ ՏԵՍԱՆՅՈՒԹ
Եթե անգամ այդ քաղաքական ուժը 2018-ին մերժվել է, մենք չենք կարող արգելել. Լիլիթ Մակունցը՝ Սերժ Սարգսյանի այցերի մասին. ՏԵՍԱՆՅՈՒԹ
Քաղաքականություն
09.03.2020 | 15:59
Որևէ մեկը չի կարող արգելք դնել միջազգային կառույցների հետ քաղաքական գործիչների հանդիպման վրա, եթե անգամ այդ քաղաքական ուժը 2018 թվականի գարնանը մերժվել է ժողովրդի կողմից: Factor.am-ի հետ զրույցում այս մասին ասաց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով Սերժ Սարգսյանի Բրյուսել կատարած այցին:
«Արգելելու միտում կամ ցանկություն չկա: Այլ հարց է, որ Սերժ Սարգսյանը քրեական գործի որոշակի շրջանակում բացակայել է ՀՀ-ից: Հուսամ, որ որևէ օրենք չի խախտվել, և եթե եղել է, իրավապահ մարմինները կարձագանքեն»,- ասաց նա:
Դիտարկմանը, որ Սերժ Սարգսյանի այս այցերի համատեքստում հարց է բարձրացվում, թե ինչու է ակտիվ քաղաքականությամբ զբաղվում, երբ պետք է իր ղեկավարման շրջանի չարաշահումների համար պատասխան տա, Լիլիթ Մակունցն ասաց. «Ես չեմ կարող արձագանքել եվրոպական կառույցների անունից»:
Սերժ Սարգսյանի՝ Բրյուսել կատարած այցի մասին տարածված մամուլի հաղորդագրությունից տեղեկանում ենք, որ նա խոսել է Հայաստանում առկա խնդիրներից, մասնավորապես՝ ժողովրդավարության և ներքաղաքական զարգացումների մասին:
Հարցին՝ սա մտահոգիչ համարո՞ւմ է, Լիլիթ Մակունցը պատասխանեց. «Մտահոգիչ չէ, ինչո՞ւ պետք է մտահոգիչ լինի: ՀՀ-ն ունի իր քաղաքական օրակարգը, որով շարժվում ենք: Ինչո՞ւ պետք է մեզ մտահոգի, թե առանձին կուսակցության ներկայացուցիչն ինչ է խոսում»:
Մանրամասները՝ տեսանյութում:
Նարեկ Կիրակոսյան
