15.10.2026 | 00:05
NATO-ի նավատորմին ծառայություններ մատուցող ընկերությունը կասկածվում է 1 միլիոն եվրոյի խարդախության մեջ
«Երջանկություն» խորագրով երաժշտական շոու-հեքիաթի երևանյան առաջնախաղը՝ Գ. Սունդուկյանի անվան թատրոնում
Մշակույթ
30.10.2017 | 17:48
ՀՀ մշակույթի նախարարության աջակցությամբ՝ ս. թ. նոյեմբերի 12-ին, ժամը 15:00-ին, Գ. Սունդուկյանի անվան ազգային ակադեմիական թատրոնում կկայանա «Երջանկություն» խորագրով երաժշտական շոու-հեքիաթի երևանյան առաջնախաղը:
Մյուզիքլի սյուժեի հիմքում երջանկության, սիրո և ընկերության հավերժ թեմաներն են, որոնք երեխաներին փոխանցվում են երգի, երաժշտության հասանելի լեզվով:
Կախարդական հեքիաթի և աշխարհի տարբեր ազգերի երաժշտական-մշակութային ավանդույթների համադրմամբ՝ հեղինակները ներկայացնում են նորարարական ձևաչափով ստեղծված մյուզիքլ. գլխավոր դերակատարներն են ռուսաստանյան հանրահայտ «Ժողովրդական արտիստ» մրցույթի հաղթող Ալքեսեյ Գոմանը, «Ունիվեր» սերիալի աստղ Ալեքսանդր Լեմարը, միջազգային մի շարք մրցույթների դափնեկիր Կարինա Մելիքյանը:
Մյուզիքլում մասնակցում են նաև մոսկովյան պրոդյուսերական կենտրոնի սաները, «Երջանկություն» միջազգային I ստեղծագործական փառատոնի դափնեկիրները, ինչպես նաև Երևանի պարարվեստի պետական քոլեջի սաները:
Միջոցառման կազմակերպիչ և գլխավոր պրոդյուսեր՝ Մերինե Մելիքյան, երաժշտության հեղինակ՝ Իլյա Բրիլին, բեմադրող ռեժիսոր՝ «Բարի հեքիաթ» թատրոնի գեղարվեստական ղեկավար՝ Վյաչեսլավ Նաումենկո:
Նշենք, որ մյուզիքլի մոսկովյան առաջնախաղը կայացել է 2017 թվականի մայիսի 30-ին Կրեմլի պետական պալատում՝ մանկապատանեկան ստեղծագործության 1-ին միջազգային «Երջանկություն» փառատոնի շրջանակում:
