12.06.2026 | 01:05
ԱԱ-2026․ Երեք կարմիր քարտ ու տանտերերի հաղթանակ՝ բացման խաղում․ ՏԵՍԱՆՅՈՒԹ
Նոր կորոնավիրուսի պատճառով 300 մլն աշակերտ և ուսանող դասի չի գնում․ ինչպե՞ս է աշխարհը պայքարում վարակի դեմ. ՏԵՍԱՆՅՈՒԹ
Հասարակություն
05.03.2020 | 20:33
Նոր տեսակի կորոնավիրուսի պատճառով աշխարհում շուրջ 300 միլիոն աշակերտ ու ուսանող ժամանակավորապես զրկված է ուսում ստանալու հնարավորությունից։
Հայաստանի ուսումնական հաստատություններում դասերը կվերսկսեն մարտի 9-ից։ Աշխարհը գրաված համաճարակն այստեղ առայժմ լուրջ սպառնալիքներ չի ներկայացնում։
Հայաստանի դպրոցներում և բուհերում դասերը մեկ շաբաթով դադարեցվել էին մարտի 2-ից՝ այն բանից հետո, երբ Իրանից հատուկ չվերթով ժամանած Հայաստանի քաղաքացու մոտ նոր տեսակի կորոնավիրուս էր հայտնաբերվել։
Եվ մինչ Հայաստանում կորոնավիրուսի վարակակիրն ընդամենը մեկն է, աշխարհում վարակակիրների ընդհանուր թիվն 95 հազար է հասնում, մահացության դեպքերինը՝ 3300-ի։
Իսկ ինչպե՞ս են տարբեր երկրներում արձագանքել նոր տեսակի կորոնավիրուսին։
Իտալիայում, որտեղ նոր կորոնավիրուսի զոհերի թիվը մեկ օրում ավելացել է 28-ով՝ հասնելով 107-ի, այսօրվանից մինչև մարտի 15-ը փակվում են բոլոր դպրոցներն ու համալսարանները։ Երկրում մշակվում է հատուկ նորմատիվ փաստաթուղթ, որը դպրոցի փակման դեպքում ծնողներից մեկին թույլ է տալիս մնալ տանը՝ երեխայի հետ։
Մեծ Բրիտանիայում, որտեղ վերջին տվյալներով կորոնավիրուսի վարակակիրների թիվն 85-ի է հասնում, մի շարք դպրոցներ շարունակում են փակ մնալ։ Դրանցում այժմ համապատասխան սանիտարական աշխատանքներ են տարվում։ Կորոնավիրուսի հետևանքով Մեծ Բրիտանիայում նաև մի քանի վիրահատական կենտրոն է փակվել։
Հնդկաստանի մայրաքաղաք Դելիում դեռ փակ են մինչև 5-րդ դասարանի ինչպես պետական, այնպես էլ մասնավոր դպրոցները։ Հնդկաստանում վարակակիրների թիվը 29-ի է հասել։
Շվեյցարիայում, որտեղ այսօր նոր կորոնավիրուսից մահացության առաջին դեպքն է գրանցվել, դպրոցներն աշխատանքը կվերսկսեն մարտի 9-ից։ Սա առայժմ վերաբերում է միայն Շվեյցարիայի Բասել քաղաքին։
ԱՄՆ մայրաքաղաք Վաշինգտոնում, որտեղ կորոնավիրուսից մահացությունը 10-ի է հասել, նույնպես դպրոցներ են փակվել։ Նույն իրադրությունն է նաև Նյու Յորքում, որտեղ վարակակիրների թիվը 11 է։ Երեկ մահացության առաջին դեպքը գրանցած Կալիֆորնիայում ևս՝ մի շարք ուսումնական հաստատություններ փակ են։
Մարտի 9-ից մեկ ամսով փակ կլինեն նաև ԱՄԷ բոլոր դպրոցներն ու համալսարանները։ Ուսումնական ծրագրից հետ չընկնելու համար այնտեղ նախատեսվում է դասապրոցեսը հեռահար կերպով կազմակերպել՝ օգտագործելով նորագույն տեխնոլոգիաները։
Ընդհանուր թվով՝ ուսումնական հաստատությունների աշխատանքը սահմանափակվել է 22 երկրում։ Դրանց շարքում են նաև Հարավային Կորեան, Ճապոնիան, Ֆրանսիան և Պակիստանը։
Մանրամասները՝ տեսանյութում։
Նելլի Մելքոնյան
