Չորս կուսակցությունից միայն ԲՀԿ-ն չհամաձայնեց մեզ ընդառաջել․ «Ոչ»-ի շտաբի ղեկավարը՝ ընտրական հանձնաժողովներում ներկայացուցիչներ նշանակելու մասին

«Ոչ»-ի քարոզչական կողմը 90 տոկոսով կատարել է իր հանձնառությունը և օրենքով սահմանված 4016 տեղից լրացրել 3970-ից ավելին։ Այս մասին Factor.am-ի հետ զրույցում նշեց «Ոչ»-ի քարոզչական կողմի ղեկավար Ռուբեն Մելիքյանը։

«Մեր բոլոր ռեսուրսներն օգտագործելով, այս կարճ ժամանակահատվածում մեզ հաջողվեց հանձնաժողովի անդամների թեկնածուներ ունենալ, և նրանց ներկայացնել օրենքով սահմանված ժամկետում՝ մինչև մարտի 1-ը։ Մենք, ի տարբերություն հակառակ կողմի, չունեինք կազմակերպական ներուժ, քանի որ մենք կուսակցություն չենք, ավելին՝ կազմակերպություն էլ չենք, այլ նախաձեռնող խումբ։ Ընդհանուր թվով՝ միայն հանձնաժողովի 37 անդամ չենք ներկայացրել։ Նշանակում չենք արել երկու տեղամասերի ընտրական հանձնաժողովներում․ Լոռու մարզի Պետրովկա և Նովոսելցևո գյուղերում»,- ասաց Ռուբեն Մելիքյանը։

Նրա խոսքով՝ գործընթացն իրենց համար դժվար է եղել։ «Առաջին հերթին բաց հայտարարություն արեցինք, որպեսզի քաղաքացիները մեզ դիմեն։ Երկրորդը՝ դիմեցինք այն կուսակցություններին, որոնք երկու չափանիշի էին համապատասխանում․ «Այո»-ն բացառող դիրքորոշում էին հայտնել և ընտրական տեղամասերում հանձնաժողովի անդամներ նշանակելու ներուժ և բազա ունեին։ Այդպիսի կուսակցությունները 4-ն էին, 4-ին էլ դիմել ենք և մեզ տեղեկատվությամբ օգնելու պատրաստակամություն ստացել ենք երեքից։ Միայն «Բարգավաճ Հայաստան» կուսակցությունն էր, որ մեզ չընդառաջեց և այդ հնարավորությունը չտվեց»,- ասաց Մելիքյանը։

Նելլի Մելքոնյան