Նրանք այլևս չեն աշխատում. Արմեն Գրիգորյանը՝ իրավապահ համակարգի դավաճանների մասին. ՏԵՍԱՆՅՈՒԹ

ՀՀ Անվտանգության խորհրդի քարտուղար Արմեն Գրիգորյանը Կառավարության նիստից հետո լրագրողների հետ զրույցում անդրադարձավ համակարգի վերին օղակներում դավաճանների առկայության մասին վարչապետ Նիկոլ Փաշինյանի հայտարարությանը՝ նշելով, որ եթե կոնկրետ անուններ տալու անհրաժեշտություն լիներ, վարչապետը կխոսեր:

«Ընդհանուր առմամբ, համակարգի ներսում պարբերաբար լինում են դեպքեր, երբ չեն կատարվում հեղափոխության պահանջներին համապատասխան քայլեր և ցանկացած դեպքում, երբ հստակեցվում, բացահայտվում են, համապատասխան որոշումներ կայացվում են: Գործնական բազմաթիվ քայլեր են մինչ այսօր կատարվել՝ սկսած կառավարման համակարգի տարբեր բարեփոխումներից մինչև որոշումներ, որոնցով եղել են մարդիկ, որ այլևս չեն աշխատում, դրանք բոլորը այդ նպատակին են ծառայում»,-ասաց նա:

Ինչ վերաբերում է պետական դավաճանության դեպքերով քրեական գործեր չհարուցելուն, Արմեն Գրիգորյանը նշեց. «Որպեսզի իրավական գործընթացն արդյունավետ լինի, մենք պետք է ունենանք անկախ դատարան, իսկ անկախ դատարանի հարցը լուծված չէ»:

Նա հույս հայտնեց, որ ապրիլի 5-ից հետո այդ հարցը ևս կլուծվի:

Անդրադառնալով ԱԱԾ ղեկավարի՝ ահաբեկիչների ցանցի մասին հայտարարություններին, Արմեն Գրիգորյանն ասաց, որ քաղաքացին այս պահին մտահոգության տեղիք չունի, որովհետև ԱԱԾ-ն արդյունավետ աշխատում է:

«Ցանցերը, որոնց մասով կասկածներ կային, բացահայտված են, և այս պահին հավելյալ ինֆորմացիա չեմ կարող տալ»,- ասաց նա:

Մանրամասները՝ տեսանյութում:

Նարեկ Կիրակոսյան