07.07.2026 | 05:59
ԱԱ-2026. Բելգիան վստահ հաղթանակով դուրս թողեց ամերիկացիներին. ՏԵՍԱՆՅՈՒԹ
Հայտնի է, թե ՍԴ-ն երբ կքննի Բանկային գաղտնիքի մասին օրենքի սահմանադրականության հարցը
Հասարակություն
04.03.2020 | 17:15
Սահմանադրական դատարանը քննության է ընդունել Բանկային գաղտնիքի մասին օրենքում փոփոխությունների սահմանադրականության հարցը որոշելու վերաբերյալ ՀՀ նախագահ Արմեն Սարգսյանի դիմումը։ Գործի դատաքննությունը կսկսվի ապրիլի 28-ին՝ ժամը 11.00-ին։ Այս մասին Factor.am-ը տեղեկանում է ՍԴ աշխատակարգային որոշումից։
Գործով զեկուցող է նշանակվել ՍԴ դատավոր Ֆելիքս Թոխյանը։ Որպես պատասխանող կողմ դատավարությանը կներգրավվի ՀՀ Ազգային ժողովը: Արմեն Սարգսյանի դիմումի քննությունը կընթանա բանավոր ընթացակարգով։
«Հաշվի առնելով, որ տվյալ գործը ձեռք է բերել հասարակական մեծ հնչեղություն, և դրա բանավոր դատաքննությունը կնպաստի գործի հանգամանքների առավել արդյունավետ բացահայտմանը, «Սահմանադրական դատարանի մասին» սահմանադրական օրենքի 73-րդ հոդվածի 6-րդ մասի և 72-րդ հոդվածի 5-րդ մասի հիման վրա՝ գործի դատաքննությունն անցկացնել բանավոր ընթացակարգով»,- ասված է ՍԴ աշխատակարգային որոշման մեջ:
Հիշեցնենք, վիճահարույց փոփոխությունը ենթադրում է բանկային գաղտնիքի վերացում։ Ըստ այդմ , օրենքը իրավապահներին հնարավորություն է տալիս ոչ միայն այս կամ այն մեղադրյալների և կասկածյալների վերաբերյալ բանկային գաղտնիք պարունակող տեղեկություններ ստանալ, այլև տեղեկանալ նրանց հետ փոխկապակցված անձանց տվյալներին։
