Նորքի ինֆեկցիոնից վստահեցնում են՝ նման հիվանդ չեն ունեցել․ Չինաստանից վերադարձած քաղաքացու ահազանգի հետքերով

Երեկ Factor.am-ին էր ահազանգել փետրվարի 20-ին Չինաստանի Շանհայ քաղաքացից վերադարձած մի քաղաքացի, որը նշում էր, թե «Զվարթնոց» օդանավակայանում իրեն վստահեցրել են, որ հիվանդանոց տեղափոխելու կամ կարանտինի տակ պահելու իմաստ չկա, իսկ հետագայում, երբ դիմել է՝ կորոնավիրուսի թեստ անցնելու նպատակով, պարզել է, որ ըստ իր անունով լրացված թղթի՝ ինքը պետք է Նորքի հիվանդանոցում պառկած լիներ:

Մեզ ուղղված նամակում քաղաքացին նշել էր․ «Երբ ինձ զանգահարեցին և հարցրին առողջությանս որպիսության մասին, ես խնդրեցի, որ ինձ տանեն թեստավորման, քանի որ գիտեմ, որ ՀՀ-ն 200 թեստի ապարատներ է ստացել Ռուսաստանից: Բժշկուհին շատ կոպիտ կերպով ինձ ասաց, թե ես կարող էի պահանջել, որպեսզի թեստ անցնեի, երբ պառկած էի Նորքի հիվանդանոցում: Այս խոսքերը ինձ անակնկալի բերեցին: Ես ասացի բժշկուհուն, որ ես ոչ մի օր չեմ անցկացրել Նորքի հիվանդանոցում, ինչին ի պատասխան բժշկուհին ասաց, որ իրեն թուղթ են փոխանցել, որտեղ նշված է, որ ես պառկած եմ եղել Նորքի հիվանդանոցում»։

Ահազանգի հետքերով Factor.am-ը կապ հաստատեց Նորք ինֆեկցիոն կլինիկական հիվանդանոցի փոխտնօրեն Էդուարդ Զարդարյանի հետ, որը մեզ հավաստիացրեց, որ իրենց մոտ 2020-ի փետրվարի 20-ից հետո Տիգրան Սուրենի Մուրադյանի տվյալներով որևէ թուղթ չկա, իրենք նման հիվանդ չեն ունեցել։

Factor.am-ը կապվեց նաև Առողջապահական և աշխատանքի տեսչական մարմին, որի իրավասության տակ է «Զվարթնոց» օդանավակայան ժամանող ուղևորների զննումը։ Տեսչական մարմնի Իրազեկման, խորհրդատվության և հանրության հետ տարվող աշխատանքների բաժնի պետ Լիանա Եղիազարյանը մեզ փոխանցեց․ «Միջազգային առողջապահական կանոնների համաձայն՝ եթե ՀՀ սահմանը հատող անձի մոտ առկա չեն վարակիչ հիվանդություններին բնորոշ կասկածելի նշաններ՝ հազ, տենդ, ջերմություն, այլ ախտանիշեր, անձը հոսպիտալացման ենթակա չէ։ Առողջապահական և աշխատանքի տեսչական մարմինը սահմանային բժշկասանիտարական անցման կետերում կորոնավիրուսի ներթափանցումը կանխարգելելու ուժեղացված վերահսկողական աշխատանքների ընթացքում առաջնորդվում է այս մոտեցմամբ։ Անձը հոսպիտալացվում է, եթե նրա մոտ առկա են թվարկած ախտանշանները»։

Անդրադառնալով քաղաքացու այն պնդմանը, թե «Թղթում նշված է, որ ես պառկած եմ եղել Նորքի հիվանդանոցում: Այսինքն՝ ստացվում է, որ ես հավանաբար ի սկզբանե պետք է տեղափոխվեի Նորքի հիվանդանոց», Լիանա Եղիազարյանը նշեց․ «Հասկանալի չէ, թե ինչ թղթեր նկատի ունի քաղաքացին։ Միայն կարող եմ ասել, որ ԱԱՏՄ-ն սահմանին լրացնում է հասցեական քարտեր, որոնցում նշվում են անձնական տվյալներ և տեղեկատվություն, թե տվյալ անձը որտեղ է գրանցված կամ բնակվելու։ Այս հասցեական քարտերը տրամադրվում են պոլիկլինիկաներին՝ անձանց առողջական վիճակի հետագա վարումն իրականացնելու համար։ Տիգրան Մուրադյանի անվամբ լրացված հասցեական քարտում հոսպիտալացման մասին որևէ նշում չկա»։

ԱԱՏՄ Իրազեկման, խորհրդատվության և հանրության հետ տարվող աշխատանքների բաժնի պետը նաև վստահեցրեց․ օդանավակայանում լրացված հասցեական քարտերով հիվանդանոցային ուղեգրումներ չեն կատարվում։

«Այս առումով կոռուպցիոն ռիսկեր հնարավոր չեն»,- ասաց Լիանա Եղիազարյանը։

Նելլի Մելքոնյան