Մայրաքաղաքի դեղատներում բժշկական դիմակների ու ալկոլուծույթի դեֆիցիտ է

Մայրաքաղաքի դեղատների մեծամասնությունում կարելի է հանդիպել «Դիմակ չունենք» գրությանը։ Չինական նոր տեսակի կորոնավիրուսի (COVID-19) տարածմամբ պայմանավորված՝ վերջին օրերին բժշկական դիմակ կամ ախտահանիչ սպիրտային լուծույթ (ալկոգել) գտնելը խիստ դժվարացել է։

Factor.am—ն այսօր առավոտյան շրջեց մոտ երկու տասնյակից ավելի դեղատներում․ Երևանի Կենտրոն, Քանաքեռ-Զեյթուն, Նոր Նորք վարչական շրջանի 2-րդ զանգվածի և Ավանի «Ալֆա Ֆարմ», «Նատալի Ֆարմ», «Վագա ֆարմ» «Էսկուլապ» , «Գեդեոն Ռիխտեր» և «36․6» դեղատների մասնաճյուղերում, որտեղ բժշկական դիմակներն ու ախտահանիչ լուծույթները բացակայում էին։

Factor.am-ը փորձեց կապ հաստատել դեղատներից մեկի մարքեթինգի և մատակարարման բաժնի աշխատակցի հետ, սակայն մեր զանգերն անպատասխան մնացին։ Դեղատներից մյուսում էլ մեզ հայտնեցին, որ դիմակ մատակարարողի հեռախոսահամարը չունեն, չեն կարող փոխանցել։

Ուշագրավ է, որ նախորդ շաբաթ Առողջապահության նախարարությունում հրավիրված ասուլիսի ընթացքում, թեմային անդրադառնալով, հայտարարվել էր, թե Հայաստանը 160 հազար դիմակ է ձեռք բերել։ Սակայն թե ուր են այդ դիմակները, դժվար է ասել։

Հավելենք, որ այսօր կրկնակի քննությամբ հաստատվել է նոր կորոնավիրուսի առկայություն՝ Իրանից ժամանած ՀՀ քաղաքացու մոտ։ Այս կապակցությամբ վարչապետ Նիկոլ Փաշինյանը ֆեյսբուքյան իր էջում գրել է․ «Կոչ եմ անում պահպանել հանգստություն, վստահել միայն կառավարության և պաշտոնական մարմինների կողմից տարածվող լուրերին, ինչպես նաև կիրառել վարակի տարածումը կանխարգելող՝ Առողջապահության նախարարության կողմից խորհուրդ տրվող միջոցները»։

Մնում է միայն պարզել՝ ինչպես են քաղաքացիները հետևելու վարչապետի այս կոչին, եթե դեղատներում բժշկական դիմակներ ու ախտահանիչ լուծույթներ չկան։

Նելլի Մելքոնյան