09.10.2026 | 11:13
ՈՒԵՖԱ-ի անդամ բոլոր երկրները միացել են ՖԻՖԱ-ում բարեփոխումների կոչին՝ բացառությամբ Ադրբեջանի
ԱԱԾ մեկուսարանը, որտեղ գտնվում են Ռոբերտ Քոչարյանը, Գագիկ Խաչատրյանն ու Նաիրի Հունանյանը, ծանրաբեռնված է
Հասարակություն
28.02.2020 | 18:31
«Երևան-կենտրոն» քրեակատարողական հիմնարկը, որն առավել հայտնի է ԱԱԾ-ի մեկուսարան անվամբ, աշխատում է ծանրաբեռնված: Այս մասին Factor.am-ի՝ ՔԿՀ-ում նկարահանում իրականացնելու գրավոր առաջարկին ի պատասխան նշել են կառույցի մամուլի ծառայությունից:
«Աշխատանքային ծանրաբեռնվածությունից ելնելով՝ ներկայումս նպատակահարմար չէ տեսանկարահանումների և հարցազրույցների իրականացումը ՀՀ ԱՆ «Երևան-կենտրոն» քրեակատարողական հիմնարկում»,- նշված է մեզ փոխանցված պատասխանում:
Նշենք, որ այս պահին ԱԱԾ մեկուսարանում են գտնվում նախկին և ներկա իշխանությունների օրոք պաշտոններ զբաղեցրած անձինք:
Մասնավորապես, Մարտի 1-ի գործով անցնող Ռոբերտ Քոչարյանը, խոշոր չափի դրամական միջոցների յուրացման մեջ կասկածվող ՊԵԿ նախկին նախագահ Գագիկ Խաչատրյանը, ինչպես նաև նրա եղբորորդի Կարեն Խաչատրյանը: ԱԱԾ մեկուսարանում են նաև հեղափոխությամբ իշխանության եկած և այժմ կաշառք վերցնելու մեջ մեղադրվող ԿԳՍՄ նախարարի արդեն նախկին տեղակալ Գևորգ Լոռեցյանը և Քաղաքաշինության կոմիտեի նախկին ղեկավար Վահագն Վերմիշյանը:
Նշենք, որ «Երևան-կենտրոն» քրեակատարողական հիմնարկում է պատիժը կրում Հոկտեմբերի 27-ի կազմակերպիչ Նաիրի Հունանյանը:
Նարեկ Կիրակոսյան։
