«Մեզ ստիպում են դիմում գրել», «Պացիենտից փող են վերցրել, գործի ժամին քնել»․ «Գրիգոր Լուսավորիչ» ԲԿ-ում իրավիճակը թեժ է

«Գրիգոր Լուսավորիչ» բժշկական կենտրոնում աշխատակիցներին ստիպում են ազատման դիմում գրել։ Այս մասին այսօր կազմակերպված բողոքի ակցիայի ժամանակ ակցիայի մասնակիցները հայտնել էին Tert.am-ի թղթակցին: «Բոլորին հեռացնում են աշխատանքից, որ հավաքվեն՝ մի 200 հոգի մարդ կհավաքվի», – ասել էր աշխատանքից ազատված բուժքույր Ժենյա Մկրտչյանը։

Բուժքրոջ խոսքով՝ բժշկական կենտրոնի տնօրինությունից տարբեր բաժինների աշխատակիցներին ստիպել են ազատման դիմում գրել, հակառակ դեպքում ասել են՝ այնպես կազատեն, որ այլ տեղ աշխատանքի ընդունվել չկարողանան․ «Բերում են իրա հորքուրի, մորքուրի աղջիկներին, մենեջերներ են բերում։ Մեր աշխատավարձերն իջեցնում են, իրանց բերած մարդկանց աշխատավարձերը՝ բարձրացնում։ Էդ էլ հո փաստ ա։ Ինչո՞ւ իմ աշխատավարձը իջավ՝ առանց ինձ զգուշացնելու։ 10 տարի աշխատել եմ այս հիվանդանոցում, որևէ նկատողություն չեմ ստացել, հիմա փրփուրներից են կախվել, գալիս պատճառ են գտնում, ազատում են աշխատանքից»։

Factor.am-ը կապ հաստատեց «Գրիգոր Լուսավորիչ» բժշկական կենտրոնի հանրային կապերի պատասխանատու Ծովինար Խաչատրյանի հետ, պարզելու, թե ինչու են աշխատակիցներին ազատվելու հորդորներ տալիս․ «Լրատվամիջոցներում շրջանառվող տեղեկությունը չի համապատասխանում։ Բժշկական կենտրոնի սրտաբանական բաժանմունքում որոշ աշխատակիցների կողմից աշխատանքային պարտականությունները ոչ պատշաճ են կատարվել, ինչի արդյունքում նրանց հանդեպ այս պահին տեղի է ունենում կարգապահական վարույթ հարուցելու գործընթաց»։

Թե ինչի համար են որոշել «պատժել» աշխատակիցներին՝ Խաչատրյանը պարզաբանեց․ «Հատուկ դեղորայքային ռեժիմը խախտվել է, պացիենտից գումար են պահանջել և վերցրել, աշխատանքային ժամին տեղից բացակայել են, քնել են աշխատանքային ժամերին, պացիենտների և նրանց հարազատների ներկայությամբ անպատշաճ բառապաշար են կիրառել»։

Խաչատրյանի դիտարկմամբ՝ աշխատակիցները նախապես իմացել են, որ իրենց կարգապահական պատասխանատվության կարող են ենթարկել, դիմել են լրատվամիջոցների, կարծելով, որ կկարողանան գործընթացը իրենց ձեռնտու ուղղությամբ տանել։

Լիլիթ Շաբոյան