08.06.2026 | 10:04
Ամփոփվել են 2005 ընտրատեղամասերից ստացված նախնական արդյունքները. ԿԸՀ
Կաշառք վերցնելու համար մեղադրվող Վահագն Վերմիշյանին վաղն աշխատանքից կազատեն
Հասարակություն
26.02.2020 | 21:28
Կառավարությունը վաղը որոշում կընդունի Վահագն Վերմիշյանին քաղաքաշինության կոմիտեի նախագահի պաշտոնից ազատելու մասին: Այս մասին Factor.am-ը տեղեկանում է վարչապետի աշխատակազմից:
Հիշեցնենք, որ Վահագն Վերմիշյանին մեղադրանք է առաջադրվել առանձնապես խոշոր չափի կաշառք վերցնելու կասկածանքով: Ըստ ԱԱԾ-ի՝ նա իր մտերիմի անունով հիմնել է նախագծման աշխատանքներ իրականացնող ընկերություն և ուղղորդել է իրեն դիմած կառուցապատողներին՝ գործարքներ կատարել հենց այդ ընկերության հետ։
Նախաքննական մարմնի փոխանցմամբ՝ Վերմիշյանը 1 միլիոնից 2,5 միլիոն դրամի չափով կաշառք է ստացել: Կրկին ԱԱԾ-ի փոխանցմամբ՝ «Հայաստանի վաստակավոր շինարարի» կոչման ներկայացնելու համար որպես կաշառք նա ստացել է 5000 դոլար գումար և շուրջ 2 միլիոն 300 հազար դրամի շինանյութ: Վահագն Վերմիշյանին առաջադրված՝ կաշառք ստանալու վերաբերյալ քրեական գործով մեղադրանք է առաջադրվել ևս 6 անձի: Վերմիշյանը եւ եւս երկու հոգի կալանավորված են:
Հիշեցնենք, որ Վահագն Վերմիշյանը քաղշին կոմիտեի նախագահի պաշտոնին նշանակվել էր նախորդ տարվա մարտին: Վերմիշյանը մասնագիտությամբ ճարտարապետ է, 1989 թվականին՝ երկրաշարժից հետո, աշխատել է որպես Ստեփանավան քաղաքի գլխավոր ճարտարապետ: Այնուհետև աշխատանքային գործունեությունը շարունակել է ՌԴ-ում, Սուդանում, Չինաստանում, Դուբայում, Եվրոպայում:
Նարեկ Կիրակոսյան
