Կան ուժեր, որոնք սա կօգտագործեն. «Իմ քայլ»-ի պատգամավորը՝ կորոնավիրուսի մասին. ՏԵՍԱՆՅՈՒԹ

ԱԺ «Իմ քայլը» խմբակցության պատգամավոր Գոռ Գևորգյանի խոսքով՝ ՀՀ բարեկամ հանդիսացող Իրանի Իսլամական Հանրապետության հետ առաջիկա երկու շաբաթների ընթացքում Հայաստանն ավելի ինտենսիվ, արտակարգ ռեժիմով է աշխատելու, որպեսզի հասկանա, թե կորոնավիրուստի հետ կապված գործողություններն ինչ զարգացումներ են ունենում:

«Չեմ կարծում, որ երկու շաբաթը կարող է որևէ խնդիր առաջացնել»,- ասաց պատգամավորը՝ շեշտելով, որ խոսքն առաջին հերթին վերաբերում է մարդկանց փոխադրումներին:

«Վարչապետի կողմից արդեն պաշտոնական հայտարարություն է եղել, որ բեռնափոխադրումների հետ կապված որևէ արգելք այս պահին չկա, արտակարգ ռեժիմով կվերահսկվեն վարորդները, որոնք տեղափոխում են բեռներ»,- նշեց Գոռ Գևորգյանը՝ անդրադառնալով հարցին, թե ինչ վտանգավոր ռիսկեր ունի Իրանի հետ սահմանը երկու շաբաթով փակ պահելը:

Ըստ նրա, Հայաստանը որևէ կերպ չի արգելում Հայաստանում գտնվող ԻԻՀ քաղաքացիներին վերադառնալ իրենց երկիր:

Պատգամավորի կարծիքով՝ Իրանում տեղի ունեցող զարգացումները Հայաստանի համար կարևոր են: «Երկու շաբաթն այն նախնական ժամանակահատվածն է, որը, ըստ իս, տրված է հասկանալու համար, թե Իրանում զարգացումներն ինչ ծավալների են հասնում, հարկ եղած դեպքում այս հարցը ևս մեկ անգամ կդրվի քննարկման: Մենք հույս ունենք, որ մարդկությանը սպառնացող նման երևույթները հնարավորինս կարճ ժամկետ կունենան: Իսկ մենք պետք է պատրաստ լինենք ցանկացած զարգացման»,- շեշտեց պատգամավորը:

Նա նաև ընդգծեց, որ Իրանի հետ սահմանի փակման հետ կապված Հայաստանը հաշվարկել է բոլոր ռիսկերը:

Մանրամասները՝ տեսանյութում:

Նարեկ Կիրակոսյան