20.02.2026 | 17:15
Հովհաննես Համբարձումյան․ Կարիերայիս ամենակարևոր գոլը խփեցի․ ՏԵՍԱՆՅՈՒԹ
Երևանում հիվանդանոցների ծանրաբեռնվածության խնդիր կա. Թագուհի Ստեփանյան
19.02.2020 | 18:25
Երևանի հիվանդանոցներում ծանրաբեռնվածության խնդիր կա: Factor.am-ի հետ զրույցում այս մասին ասաց «Շտապօգնություն» ՓԲԸ տնօրեն Թագուհի Ստեփանյանը՝ ընդգծելով, սակայն, որ բոլոր հիվանդները պատշաճ բժշկական օգնություն ստանում են:
«Կա ծանրաբեռնվածության խնդիր, բայց, ամեն դեպքում, եթե մարդը կարիք ունի օգնության, բնականաբար, ստանում է: Եթե ոչ մեկ հիվանդանոցում, ապա՝ մյուսում։ Մի տեղ եթե զբաղված են լինում մահճակալները, մյուս հիվանդանոցն է ընդունում»,- ասաց Թագուհի Ստեփանյանը։
Հարցին՝ արդյո՞ք մարզային հիվանդանոցներից հոսպիտալացման կարիք ունեցող հիվանդներին ուղղորդում են Երևան, նա բացասական պատասխան տվեց:
«Եթե մարզերում հիվանդն օգնության կարիք ունի, օգնությունն այնտեղ է ցուցաբերվում: Բայց եթե հիվանդի հարազատները ցանկություն ունեն բուժումը Երևանում կազմակերպել, բնականաբար, նրան կարող են տեղափոխել մայրաքաղաք»,- ասաց «Շտապօգնություն» ՓԲԸ-ի ղեկավարը:
Թագուհի Ստեփանյանը տեղեկացրեց նաև, որ, մասնավորապես, նախօրեին Երևանում եղել է 817 կանչ, որոնցից 163-ի դեպքում քաղաքացուն հիվանդանոց են տեղափոխել:
Նշենք, որ այս իրավիճակը հիմնականում կապված է սեզոնով պայմանավորված՝ սուր շնչառական վարակների հետ: ՀՀ Առողջապահության նախարարության տարածած հաղորդագրության համաձայն՝ ՍՇՎ-ներով պայմանավորված՝ բուժօգնության դիմելության ծավալներն ու հոսպիտալացման դեպքերը նվազում են:
