Քաղաքականություն
19.02.2020 | 14:52Ադրբեջանում հերոսները քնած հայերին սպանողներն են, և դա չի փոխվել: Այսօր լրագրողների հետ հանդիպմանն ասաց «Օրբելի» վերլուծական կենտրոնի փորձագետ Տարոն Հովհաննիսյանը՝ ասուլիսը սկսելով հայ սպա Գուրգեն Մարգարյանի հիշատակը հարգելու առաջարկությամբ:
Նա հիշեցրեց՝ 2004 թվականի հունվարի 19-ին Հունգարիայի մայրաքաղաքում տեղի ունեցած սպանության մասին, երբ ադրբեջանցի Ռամիլ Սաֆարովը կացնահարեց քնած հայ սպային, իսկ տարիներ հետո արտահանձնվեց Ադրբեջանին, որտեղ նրան ազատ արձակեցին ու հերոսացրին:
«Սա միայն պատմություն չէ մի հայ սպայի սպանության վերաբերյալ, այլ պատմություն է Ադրբեջան պետության և նրա որդեգրած քաղաքականության վերաբերյալ: Այս օրը մեզ պարտադրում է ևս մեկ անգամ հիշել, որ Ադրբեջանում հերոսները քնած հայերին սպանողներն են, և դա չի փոխվել: Սա ամենևին էմոցիոնալ ընկալում չէ, այլ իրականության ընկալումը, թե ում հետ մենք գործ ունենք, որովհետև նույնը իրենք ցույց տվեցին նաև 2016 թվականի ապրիլյան պատերազմի օրերին»,- հավելեց փորձագետը:
Անդրադառնալով Նիկոլ Փաշինյանի և Իլհամ Ալիևի մյունխենյան դեբատին՝ Տարոն Հովհաննիսյանը նշեց, որ այդ հանդիպման ընթացքում Ալիևի պահվածքն ու խոսքի բնույթը մեզ ցույց տվեցին, որ այդ երկրի նախագահն իրոք մտածում է այնպես, ինչպես խոսում է:
«Ուշադրություն դարձնենք, թե ինչ քամահրանքով էր նա խոսում միջազգային իրավունքի շատ կարևոր նորմի՝ ինքնորոշման իրավունքի մասին: Սա ադրբեջանական թեզն է, և հիմա այդ երկրի նախագահը հայտարարում է, որ եթե հայերը ցանկանում են, իր բառերով՝ երկրորդ անգամ ինքնորոշվել, թող գնան այլ տեղ փնտրեն այս աշխարհի վրա, ոչ թե Ադրբեջանի կազմում: Իլհամ Ալիևը, փաստացի, իր այս հայտարարությամբ մեկ անգամ ևս հաստատեց իրենց մտածելակերպը. մեզ պետք են տարածքներ, այս դեպքում՝ Ղարաբաղը՝ առանց հայերի»,- հիշեցրեց փորձագետը:
Տարոն Հովհաննիսյանի կարծիքով՝ Ալիևը մյունխենյան հանդիպմանը եկել էր՝ շոու անելու, ոչ թե խնդրի լուծման վերաբերյալ օրակարգ ներկայացնելու:
Մանրամասները՝ տեսանյութում:
