26.09.2026 | 20:38
Քաղաքացին ընկել է ջրհորը. նա հոսպիտալացվել է
Արցախի և Հայաստանի Անվտանգության խորհուրդները, չի բացառվում, որ կրկին համատեղ նիստ կգումարեն
Քաղաքականություն
19.02.2020 | 13:12
Չի բացառվում, որ Հայաստանի և Արցախի Անվտանգության խորհուրդներն Արցախում համատեղ նիստ գումարեն: Factor.am-ի հարցին ի պատասխան՝ այս մասին ասաց Արցախի նախագահի մամուլի խոսնակ Դավիթ Բաբայանը։
«Այս գործընթացը պարբերական բնույթ է կրում, և նման նիստերն արդեն դարձել են բարի ավանդույթ: Չի բացառվում, որ այդպիսի նիստ տեղի ունենա մոտակա ժամանակահատվածում: Մենք կտեղեկացնենք, և՛ նիստի մասին, և՛ քննարկված հարցերի մասին»,- նշեց Բաբայանը։
Հարցին՝ ե՞րբ է հրավիրվելու նիստը, ովքե՞ր են մասնակցելու և ի՞նչ է քննարկվելու, Դավիթ Բաբայանը պատասխանեց, որ կտեղեկացնեն, երբ նիստը լինի:
ՀՀ Անվտանգության խորհրդի քարտուղարի խոսնակ Արեգ Քոչինյանն էլ մեզ հետ զրույցում նշեց, որ ԱԽ նիստի վերաբերյալ տեղեկություն տրամադրվում է վարչապետի որոշմամբ:
«Անվտանգության խորհրդի նիստի վերաբերյալ տեղեկատվություն և լուսաբանման թույլտվություն տրամադրվում է միայն վարչապետի աշխատակազմի կողմից՝ վարչապետի որոշմամբ։ Սա հստակ սահմանվում է Անվտանգության խորհրդի մասին օրենքի 3-րդ գլխում»,- հավելեց նա:
Հիշեցնենք, որ հեղափոխությունից հետո սա Հայաստանի և Արցախի Անվտանգության խորհուրդների երրորդ համատեղ նիստը կլինի: Առաջինը տեղի է ունեցել 2019 թվականի մարտի 12-ին՝ Ստեփանակերտում, ՀՀ վարչապետ Նիկոլ Փաշինյանի և ԱՀ նախագահ Բակո Սահակյանի համանախագահությամբ: Երկրորդ համատեղ նիստը տեղի է ունեցել դեկտեմբերի 23-ին՝ Երևանում, Նիկոլ Փաշինյանի, Բակո Սահակյանի և ՀՀ նախագահ Արմեն Սարգսյանի մասնակցությամբ:
