14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Բանակը չպետք է թիրախավորել. Անդրանիկ Քոչարյան. ՏԵՍԱՆՅՈՒԹ
Քաղաքականություն
18.02.2020 | 15:40
Պատգամավորների հանդիպումը ՀՀ Զինված ուժերի Գլխավոր շտաբի պետ Արտակ Դավթյանի հետ արդյունավետ էր և բովանդակալից: Այս մասին այսօր լրագրողների հետ հանդիպման ժամանակ հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը:
Նրա խոսքով՝ մտահոգություն առաջացնող շատ հարցեր ստացել են իրենց պատասխանները: «Մենք՝ որպես օրենսդիր մարմին, դեռ շատ անելիքներ ունենք: Հստակ պայմանավորվածություններ ենք ձեռք բերել ԶՈւ ԳՇ-ի հետ համագործակցության մասին»,- ասաց պատգամավորը:
Իր հերթին, «Իմ քայլը» խմբակցության պատգամավոր Անդրանիկ Քոչարյանը նշեց, որ քննարկված հարցերն ունեն գաղտնիության բարձր մակարդակ:
«Մենք պետք է հաշվի առնենք, որ Զինված ուժերում միջադեպերը մեզ ստիպում են անել ամեն ինչ բանակի համար: Այսօր բանակը չպետք է թիրախ դառնա: Բոլորս պետք է կանգնած լինենք բանակի կողքին»,- ասաց Քոչարյանը, որն ավելի վաղ բազմիցս խոսել է բանակում կոռուպցիայի մասին և քննադատել հրամանատարությանը:
Հիշեցնենք, որ այսօր Ազգային ժողովում կայացել է ԱԺ Մարդու իրավունքների պաշտպանության և հանրային հարցերի մշտական հանձնաժողովի ու ԱԺ Պաշտպանության և անվտանգության հարցերով մշտական հանձնաժողովի նիստը, որին մասնակցել է ՀՀ ԶՈւ ԳՇ պետ Արտակ Դավթյանը:
Տարեսկզբին ՀՀ ԶՈւ-ում և ԼՂՀ Պաշտպանության բանակում ոչ մարտական պայմաններում զոհվել է 13 զինծառայող: Մի քանի դեպքի փաստով քրեական գործ է հարուցվել «ինքնասպանության հասցնելու» հոդվածով:
Մանրամասները՝ տեսանյութում:
