ԵՐԵՎԱՆԻ ԺԱՄԱՆԱԿՈՎ. Ցավալի է, որ մեր երկրի ղեկավարությունը «Կարգին հաղորդում»-ից այն կողմ բան չի ցիտում. Էդգար Բաղդասարյան. ՏԵՍԱՆՅՈՒԹ

«Այսօր ատելության մթնոլորտն արհեստականորեն գեներացվում է ռևանշիստների, հին իշխանության կողմից, բայց նախկիններն էլ հետ չեն գա, ես նման վտանգ չեմ տեսնում»,- Factor TV-ի «Երևանի ժամանակով» զրուցաշարի շրջանակում տեսակետ է հայտնում կինոռեժիսոր Էդգար Բաղդասարյանը:

Ամեն դեպքում, ներկայիս իշխանության գործելաոճը ևս նրան չի բավարարում: Ռեժիսորը ժողովրդի անունից իշխանությանը խնդրում է չքաղաքականացնել ամբողջ ազգը և քիչ խոսել, դադարել «զբաղվել դեմագոգիայով»:

«Ով նախկին իշխանության հետույքը չի համբուրել, իր համար լավ չի եղել, բայց այսօր էլ կան հետույքներ, որոնք պետք է համբուրել. դա է ինձ մտահոգում: Իրավիճակը նույնն է: Սա անձերի խնդիր չէ, սա կադրային վատ քաղաքականության և պետական մտածողության բացակայության խնդիր է, դեկլարատիվ սուտ բաների, բյուրոկրատիզմի մեջ է խնդիրը»,- շեշտում է պարոն Բաղդասարյանը:

Մեր երկրում տարվող մշակութային քաղաքականությունից ևս ռեժիսորը գոհ չէ: Նա Կրթության, գիտության, մշակույթի և սպորտի նախարարությունից պահանջում է ներկայացնել տվյալներ՝ կոնկրետ մշակույթի մասով պետական բյուջեից ինչ ծախսեր են արվում և ինչ նպատակով. «Մշակույթի նախկին նախարար Լիլիթ Մակունցին կողքիններն այնպիսի խորհուրդներ տվեցին, որ սարքեցին մեմ, ծաղրեցին՝ գնաց, իսկ Արայիկ Հարությունյանին մշակույթն ընդհանրապես չի հետաքրքրում: Երբ ռեժիսորներով ասում ենք, որ մեզ պետական աջակցություն է պետք, ասում են՝ գումար չկա: Ներողությո՛ւն, եկեք աուդիտ անցկացնենք, տեսնենք՝ էդ ինչի՞ վրա եք ծախսում էդ գումարները, ո՞ւր եք գնում, ի՞նչ անիմաստ հոբելյաններ եք նշում… Այսպես հեռուն չենք գնա: Ցավալի է, որ մեր երկրի ղեկավարությունը «Կարգին հաղորդում»-ից այն կողմ բան չի ցիտում, դա պատահակա՞ն է. դա մտահորիզոն է ցույց տալիս»,- ասում է մեր զրուցակիցը:

Նրա տպավորությամբ՝ պաշտոնյաները արվեստագետներին հաճախ վերաբերվում են որպես մուրողների: «Չինովնիկը մեզ հետ դատախազի նման է խոսում…Մեր երկրում տիրող իրավիճակը ֆարս է, տրագիկոմեդիա, իսկ «հեփի էնդ» հնարավոր է, եթե ղեկավարները կադրային ճիշտ քաղաքականություն վարեն ու պետական մտածողությամբ առաջնորդվեն»,- եզրափակում է պարոն Բաղդասարյանը:

Աննա Բաբաջանյան