Հ1-ի աշխատակիցներն ահազանգում են՝ եկամտահարկի համահարթեցման արդյունքում իրենց աշխատավարձերը չեն ավելացել. տնօրինությունից հերքում են

Հայաստանի հանրային հեռուստաընկերության «Առաջին ալիքի» մի խումբ աշխատակիցներից Factor.am-ն ահազանգ է ստացել: Պետական միջոցներից սնվող հեռուստաընկերության աշխատակիցները մեզ տեղեկացրել են, որ եկամտահարկի համահերթեցումից հետո իրենց  աշխատավարձում փոփոխություն չի եղել:

Հիշեցնենք, որ Հարկային օրենսգրքում տեղի ունեցած փոփոխությունների արդյունքում 150 հազար դրամ ստացողները եկամտահարկ վճարում էին իրենց աշխատավարձի 23 տոկոսը, 150 հազարից մինչև 2 միլիոն դրամ ստացողները՝ 28 տոկոսը, իսկ 2 միլիոնից ավելի ստացողները՝ 36 տոկոսը: Հունվարի 1-ից արդեն բոլորը վճարում են 23 տոկոս եկամտահարկ:

Հանրային հեռուստաընկերության մեր աղբյուրների փոխանցմամբ՝ 2020 թվականի հունվարի 1-ից «Առաջին ալիքի»  աշխատակիցների, մասնավորապես, շուրջ 70 աշխատակից ունեցող  լրատվական և վերլուծական հաղորդումների բաժնի  աշխատակիցների մեծ մասի    աշխատանքային և ծառայությունների մատուցման պայմանագրերում փոփոխություններ են իրականացվել, որոնց արդյունքում այդ աշխատակիցները ստացել են այնքան աշխատավարձ, որքան մինչ օրենքի ուժի մեջ մտնելը:

«Առաջին ալիքի» ղեկավարության այս որոշումը  հետտոնական սառը ցնցուղ է եղել  այդ աշխատակիցների համար, նրանք նախ որոշել են դժգոհության ալիք բարձրացնել և չստորագրել նոր պայմանագրերը: Սակայն, ի վերջո, տեղի են տվել  վարչական մասից ստացվող պարբերական զանգերի արդյունքում։

Ահազանգի վերաբերյալ  Factor.am-ը  դիմել է «Առաջին ալիքի» գործադիր տնօրեն Մարգարիտա Գրիգորյանին՝ պարզաբանման խնդրանքով: Մեր գրավոր հարցերին ի պատասխան հեռուստաընկերության հասարակայնության հետ կապերի բաժնից փոխանցել են. «2020 թվականին աշխատակիցների պայմանագրերում համահարթեցման արդյունքում որևիցէ փոփոխություն չի կատարվել: ՀՀ Հարկային օրենսգրքի շրջանակներում եկամտային հարկի համահարթեցման արդյունքում նախկինում 150 հազար դրամ և ավելի հարկման բազա ունեցող աշխատակիցների աշխատավարձերը բարձրացել են»:

Ուշագրավ է, որ «Առաջին ալիքի» ղեկավարությունը խուսափել է պատասխանել Factor.am-ի այն հարցին, թե համահարթեցման արդյունքում քանի՞ աշխատակցի աշխատավարձ է բարձրացել:

Հիշեցնենք, որ  քաղաքական իշխանությունը՝ Նիկոլ Փաշինյանի գլխավորությամբ, եկամտային հարկի համահարթեցումը համարում էր կարևորագույն ձեռքբերում: Ըստ նրա՝ այս փոփոխությունը բարելավելու էր քաղաքացիների սոցիալական վիճակը: Մինչդեռ մեզ դիմած  «Առաջին ալիքի» աշխատակիցները դժգոհում են, որ իրենց համար այդ փոփոխության դրական արդյունքը նկատելի չէ և նշում են, որ իրենց խաբված են զգում։

2020 թվականի պետական բյուջեով Հանրային ՀԸ-ին հատկացվել է 7 մլրդ 396 մլն 131 հազար դրամ: Սա միայն տեղեկատվական, քաղաքական, տնտեսական, մանկապատանեկան և հանրության համար նշանակալի այլ բնույթի հաղորդումների արտադրությունն ու հեռարձակումն ապահովելու համար:

Նարեկ Կիրակոսյան