«Իշխանությունների դանդաղկոտությունը հակահեղափոխականների մեջ հույսեր արթնացրեց»․ Սոնա Այվազյան. ՏԵՍԱՆՅՈՒԹ

Տարիներ շարունակ Հայաստանում ընտրությունների արդյունքները կեղծվել են տվյալ օրվա իշխանության, ռեժիմի կողմից։ Եղել է հանցագործություն և, ըստ էության, քաղաքացիների հիմնական՝ ընտրելու իրավունքը, ոտնահարվել է, քաղաքացիների ձայները գողացվել են։ Այդ հանցագործությունն ավարտին հասցնող կառույցը միշտ եղել է Սահմանադրական դատարանը։ Այս մասին այսօր «Հանրաքվեից առաջ. ի՞նչ մոտեցումներ ունեն քաղհասարակության կառույցները» թեմայով քննարկմանը նշեց Թրանսփարենսի Ինթերնեշնլ հակակոռուպցիոն կենտրոնի տնօրեն Սոնա Ազյվազյանը։

«Դրանով ՍԴ-ն հուսալքել է քաղաքացիներին ու լուրջ հիասթափություն բերել։ Հեղափոխությունից հետո մենք ակնկալում էինք, որ նոր իշխանություններն իրավական և քաղաքական գնահատական կտան անցյալին և ոչ միայն դատական իշխանության մասով, այլ, առհասարակ, պետության զավթմանը, և շատ արագ քայլեր կձեռնարկեն և՛ սահմանադրական փոփոխությունների համար, և՛ հին ռեժիմի վարկաբեկված կառույցներն ու կազմը վերանայելու ուղղությամբ, ինչը, ցավոք, չարվեց։ Այսօր մենք ականատեսն ենք նրան, որ իշխանությունների դանդաղկոտությունը բերեց ներքին լարվածության, բերեց նրան, որ հեղափոխությանը սատարող քաղաքացիները սկսեցին հիասթափություն ապրել։ Այս ամենը նաև հույսեր արթնացրեց հակահեղափոխական ուժերի մոտ, որ այս ամենը ժամանակավոր է և նրանք դեռևս կարող են վերադառնալ իշխանության։ Այս առումով՝ քայլը, որն արվեց, դրական է։ Ես չեմ տեսնում այլ ելք, որը հնարավոր էր»,- ասաց Թրանսփարենսի Ինթերնեշնլ հակակոռուպցիոն կենտրոնի տնօրենը։

Սոնա Ավազյանը հավելեց, որ իրենց վերջին ուսումնասիրության արդյունքում պարզել են, թե Հայաստանում ամենակոռումպացված կառույցը դատական համակարգն է:

«Երկրորդը համարվում են ԶԼՄ-ները, երրորդը՝ Դատախազությունը»,- ասաց Սոնա Այվազյանը։

Մանրամասները՝ տեսանյութում։

Նելլի Մելքոնյան