17.11.2024 | 23:16
Բայդենը թույլատրել է Ուկրաինային օգտագործել ԱՄՆ-ից մատակարարված հեռահար հրթիռները․ AP
Իշխանությունը չունի Հոկտեմբերի 27-ը բացահայտելու այն ցցուն պահանջը, որը կա Մարտի 1-ի դեպքում․ Անահիտ Բախշյան. ՏԵՍԱՆՅՈՒԹ
Քաղաքականություն
12.02.2020 | 20:23
1999 թ. հոկտեմբերի 27-ին ԱԺ-ում սպանված ԱԺ նախկին փոխնախագահ Յուրի Բախշյանի այրու՝ Անահիտ Բախշյանի դիմումի հիման վրա Գլխավոր դատախազությունը վերաբացել էր «Հոկտեմբերի 27»-ի գործից անջատված մասն ու սկսել նոր քննություն։ Գլխավոր դատախազը գործն ուղարկել էր ԱԱԾ, որտեղ արդեն ձևավորվել է քննչական խումբ: Տուժողի իրավահաջորդ Անահիտ Բախշյանն արդեն երեք անգամ հրավիրվել է ԱԱԾ: Այս մասին Factor TV-ին տված հարցազրույցում նշել է Անահիտ Բախշյանը:
Բախշյանը նշեց, որ իրեն ԱԱԾ-ում երաշխավորել են, որ պատրաստ են գործը հասցնել ճիշտ ավարտին: Տարիներ առաջ ՌԴ Անվտանգության դաշնային ծառայության նախկին աշխատակից Ալեքսանդր Լիտվինենկոն Հոկտեմբերի 27-ի ահաբեկչության կազմակերպան համար մեղադրել էր ՌԴ հատուկ ծառայություններին և մասնավորապես Գլխավոր հետախուզական վարչությանը: Հայաստանի ԱԱԾ-ն մշտապես համարվել է ռուսական ԱԱԾ-ի կցորդը, Անահիտ Բախշյանից հետաքրքրվեցինք՝ արդյոք ԱԱԾ-ն Ալեքսանդր Լիտվինենկոյի հայտարարության անաչառ ուսումնասիրության վերաբերյալ էլ է երաշխիքներ տվել:
«Ալեքսանդր Լիտվինենկոյի հայտարարության վերաբերյալ խոսակցություն եղել է, իրենք արդեն խոսում էին այն մասին, թե ինչպես կարող են անել: Եթե իրենք մոռանան, ես կհիշեցնեմ»,- ասաց նա:
«Հոկտեմբերի 27»-ի գործով տուժողի իրավահաջորդ Անահիտ Բախշյանը հունվարի 14-ին նամակով դիմել էր ՀՀ վարչապետին, ԱԺ նախագահին և գլխավոր դատախազին, որպեսզի «Հոկտեմբերի 27»-ի գործով տուժողի իրավահաջորդ ճանաչվեն ոչ թե զոհերի հարազատները, այլ Հայաստանի Հանրապետությունը ի դեմս կառավարության և խորհրդարանի:
Անահիտ Բախշյանն ասաց, որ նամակին անմիջապես արձագանքել է ՀՀ գլխավոր դատախազը: «Մենք հանդիպել ենք, երկար խոսել ենք, նա ասել է, որ որևէ օրենքով կառավարությունը և խորհրդարանը չեն կարող տուժողներ ճանաչվել: Սա ինձ համար շատ տարօրինակ է, որովհետև այս գործը կոռուպցիայի մասին չէ, սա պետականության դեմ ուղղված հանցագործություն է: Կառավարությունից ստացել եմ պատասխան, որ նամակն ուղարկվել է դատախազին, բայց Ազգային ժողովից որևէ արձագանք չեմ ստացել»,- ասաց Անահիտ Բախշյանը:
Պատասխանելով հարցին, թե ըստ իրեն, ինչու ԱԺ-ից չեն արձագանքել նամակին, Անահիտ Բախշյանը մեկնաբանեց. «Երեկ տեղեկացել եմ, որ ԱԺ նախագահին ուղղված նամակը ուղարկվել է պետաիրավական հարցերի մշտական հանձնաժողով, տեսեք թե ինչքան ժամանակ է անցել: Այնտեղից ինձ ասել են, որ կկանչեն, կհանդիպենք, կզրուցենք: Այսօրվա իշխանությունները Հոկետեմբերի 27-ի նկատմամբ չունեն այն ցցուն հետաքրքրությունը կամ բացահայտելու պահանջը, ինչպես Մարտի 1-ինը: Մարտի 1-ին իրենք տուժել են, Հեկտեմբերի 27-ին պետությունն է տուժել: Պետությունն է տուժել, Ազգային ժողովն է տուժել, ԱԺ նախագահը գոնե իր երկրի արժանապատվությունը պահելու համար ինչ-որ քայլ պետք է անի, որ մենք իմանանք ինքն այդ ցավի կրողն է»:
Հարցազրույցն ամբողջությամբ՝ տեսանյութում:
Նարեկ Կիրակոյսան
