ՍԴ անդամ Ալվինա Գյուլումյանը՝ ԱԺ նախագահ Արարատ Միրզոյանի հետ հանդիպումների մասին

Ազգային ժողովի աշխատակազմի ղեկավարի նախկին տեղակալ Արսեն Բաբայանը տեղեկացրել էր, որ ԱԺ նախագահ Արարատ Միրզոյանն այս օրերին պարբերաբար հանդիպումներ է ունենում ՍԴ առանձին դատավորների, այդ թվում` դատավոր Ֆելիքս Թոխյանի հետ: Տեղեկությունը Արսեն Բաբայանին փոխանցել էին Ազգային ժողովի աշխատակազմից:

Ազգային ժողովից առայժմ չեն հստակեցնում, թե Արարատ Միրզոյանը Ֆելիքս Թոխյանից զատ ում հետ է հանդիպել: Հայտնի չէ նաև, թե հանդիպումներն ում նախաձեռնությամբ են կայանում:

ՍԴ դատավոր Ալվինա Գյուլումյանը Factor.am-ի հետ զրույցում ասաց, որ ինքը չի հանդիպել Ազգային ժողովի նախագահի հետ և չի կարող մանրամասներ փոխանցել. «Ես չեմ հանդիպել, ով հանդիպել է, թող նա էլ խոսի: Ես չգիտեմ, թե ով է հանդիպել»:

Ալվինա Գյուլումյանը հավելեց, որ չի պատրաստվում Արարատ Միրզոյանի հետ հանդիպել. «Ես անկախ դատավոր եմ, ես իշխանության ոչ մի թևի հետ հանդիպել չեմ ուզում՝ ո՛չ գործադիր, ո՛չ օրենսդիր»:

ՍԴ մյուս դատավորների հետ կապ հաստատել և այս հարցի շուրջ մեկնաբանություն ստանալ չհաջողվեց։

Հիշեցնենք, որ իշխանությունները պատրաստվում են ապրիլի 5-ին սահմանադրական հանրաքվե անցկացնել:

Հնարաքվեի է դրվելու «ՀՀ Սահմանադրությունում փոփոխություններ կատարելու մասին» օրենքի նախագիծը, ըստ որի՝ մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է։ Նախագծի հիմնավորման մեջ մասնավորապես նշվում է. ՍԴ ներսում և դրա շուրջ առկա ճգնաժամն այս պահին ունի մի քանի ասպեկտ, որոնք լրջագույն մարտահրավեր են Հայաստանի ժողովրդավարության, ինքնիշխանության և իրավական որակների համար:

Նարեկ Կիրակոսյան