26.09.2026 | 20:38
Քաղաքացին ընկել է ջրհորը. նա հոսպիտալացվել է
Գագիկ Ծառուկյանը լքել է 1-ին տեղը․ հայտնի են ԱԺ-ից ամենաշատը բացակայած, կողմ և դեմ քվեարկած պատգամավորները
Քաղաքականություն
10.02.2020 | 13:26
ԱԺ մոնիթորինգ ծրագիրն ամփոփել է 7-րդ գումարման ԱԺ-ի երրորդ նստաշրջանի աշխատանքները։ Այսօր «ԱԺ մոնիթորինգ» ծրագրի ղեկավար Լուսինե Վասիլյանը ներկայացրեց տվյալները։
Ըստ այդմ՝ պատգամավորներից ամենաշատ «կողմ» քվեարկածը ԲՀԿ-ից Կարինե Պողոսյանն է (189), ամենաշատ դեմ քվեարկած պատգամավորը իշխանական է՝ «Իմ քայլից» Հայկ Սարգսյանը (30), ամենաշատը ձեռնպահ է քվեարկել «Իմ քայլի» պատգամավոր Թագուհի Թովմասյանը (18)։
Լուսինե Վասիլյանը պարզաբանեց, որ ութամյա առաջնորդությունից հետո Գագիկ Ծառուկյանը զիջել է դիրքերը՝ իբրև ամենաշատը բացակայած պատգամավոր, տեղը զիջելով Արուսյակ Ջուլհակյանին։
Ըստ մոնիթորինգի՝ ամենաշատը բացակայել է իշխանական պատվամավոր Արուսյակ Ջուլհակյանը (132), ամենաշատ հարց տվել ու ելույթ է ունեցել ԲՀԿ-ական Միքայել Մելքումյանը (79)։
«Իմ քայլի» պատգամավորները հարց են տվել ու ելույթ ունեցել 578 անգամ, ԲՀԿ-ականները՝ 236 անգամ, «Լուսավոր Հայաստանի» պատգամավորները 144 անգամ։
Ըստ այդմ՝ «Իմ քայլի» պատգամավորները միջինում հնչեցրել են 7, մյուս երկու խմբակցությունների պատգամավորները՝ 8-ական հարց ու ելույթ։ 7-րդ գումարման խորհրդարանի 3-րդ նստաշրջանում ընդունված օրենքների 30%-ը հեղինակել է ԱԺ-ն, 70%-ը՝ կառավարությունը։
Լուսինե Վասիլյանն ասում է՝ ԱԺ մոնիթորինգի տասնամյա դիտարկումների ընթացքում սա ամենաբարձր ցուցանիշն է․ «Ունեցել ենք նստաշրջաններ, երբ խորհրդարանի մասնաբաժինը եղել է 5%։ Սա հիմնական տարբերությունն է, որ արձանագրում ենք երկրորդ նստաշրջանի համեմատ»։
Հետաքրքրական է, որ կառավարության որևէ նախագիծ չի մերժել խորհրդարանը, բայց ընդունվել են նախագծեր, որոնց վերաբերալ վերապահումներ է ունեցել կառավարությունը։ Օրինակ՝ Վարազադատ Կարապետյանի առաջարկը՝ Սևանա լճից ջրառի ծավալի սահմանափակման վերաբերյալ, կառավարությունը համարել էր ոչ բավարար հիմնավորված, բայց այն ընդունվել է 101 կողմ ձայնով։
Մանրամասները՝ տեսանյութում:
Ռոբերտ Անանյան
