Ավելի հասանելի մշակույթ. Հայաստանում ապրող թոշակառուները թատրոնի և թանգարանի անվճար տոմսեր կստանան. ՏԵՍԱՆՅՈՒԹ

Ավելի հասանելի մշակույթ՝ Հայաստանում ապրող աշխատանքային, զինվորական ու հաշմանդամություն ունեցող կենսաթոշակառուների համար։ Այսուհետ Երևանում ու մարզերում նրանք կարող են թանգարան ու թատրոն այցելել բոլորովին անվճար։ Երկու նախարարությունների միջև այսօր հուշագիր կնքվեց։

«Բավականին երկար քննարկել ենք մեխանիզմները և արել առավելագույնը, որ լրացուցիչ բարդություններ չստեղծենք մեր հայրենակիցների համար։ Որոշակի ընթացակարգ են մշակել, որով նրանք կարող են ներկայացումներից առաջ ստանալ համապատասխան տոմսերը»,- պարզաբանում է Կրթության, գիտության, մշակույթի և սպորտի նախարար Արայիկ Հարությունյանը։

Ընթացակարգը պարզ է․ անվճար տոմս վերցնելու համար անձը հաստատող փաստաթղթով պետք է մոտենա մշակութային հաստատություն։ «Թատրոններ կարող են այցելել տարին 3 անգամ, իսկ թանգարաններ՝ ամիսը 2 անգամ։  Սա նշանակում է, որ արդյունքում, առնվազն, տարին 48 ներկայացում դիտելու և գրեթե ամեն օր թանգարան այցելելու հնարավորություն կունենան նշված խմբի քաղաքացիները»,- ասում է Աշխատանքի և սցիալական հարցերի նախարար Զարուհի Բաթոյանը։

Յուրաքանչյուր մշակութային կազմակերպություն ինքնուրույն կորոշի անվճար տրամադրվող տոմսերի քանակը։ «Մշակութային միջոցառումների ժամանակ դրանց որոշակի տոկոս կոնկրետ այս ծրագրի համար է հատկացվելու՝ ընդհանուր միջոցառումների 2,5-5% -ի սահմաններում»,- նշում է Արայիկ Հարությունյանը։

Անվճար տոմսեր կտրամադրվեն նաև տարեցներին ծառայություններ մատուցող կազմակերպություններին։ Այդ դեպքում, սակայն, թոշակառուների թիվը չի կարող գերազանցել 20-ը։

Աշխատանքի և սոցիալական հարցերի նախարար Զարուհի Բաթոյանի խոսքով՝ սա կարևոր նախաձեռնություն է ոչ միայն ֆինանսական հասանելիության իմաստով, այլ նաև խթան է՝ մշակույթը ֆիզիկական և բովանդակային իմաստով ավելի մատչելի դարձնելու համար։

Անվճար տոմսերը թոշակառուները կարող են ձեռք բերել մշակութային միջոցառումից առնվազն 1 օր առաջ։ Թանգարանների դեպքում՝ դրանք կտրվեն այցելության պահին։

Մանրամասները՝ տեսանյութում։

Նելլի Մելքոնյան