Սյունիքում զինծառայողները ձնահյուսի տակ են մնացել խրամատում՝ մարտական հերթապահության ժամանակ

Պաշտպանության նախարարությունը փետրվարի 7-ին հայտնել էր, որ Սյունիքի մարզում` N զորամասի պահպանության տեղամասում, ձնահյուսի տակ են մնացել չորս պայմանագրային զինծառայող: Նրանցից երեքը զոհվել է, իսկ մեկը մարմնական վնասվածքներ ստացել:

Factor.am-ին հայտնի դարձավ, որ նշյալ զինծառայողները ձնահյուսի տակ են մնացել խրամատում, այդ պահին նրանք եղել են մարտական հերթապահության։ Առայժմ անհայտ պատճառներով ձյան հաստ շերտը փլուզվել է խրամատի մեջ:

Այս տեղեկությունը Factor.am-ի հետ զրույցում հաստատեց նաև ՊՆ մամուլի խոսնակ Արծրուն Հովհաննիսյանը: Նա այլ մանրամասներ չփոխանցեց:

Ձնահյուսի տակ մնացած պայմանագրային զինծառայողներն են շարքային Կարապետ Սեդրակի Նազարյանը (ծնվ. 1991թ., զինված ուժերում էր 2018թ.-ից, Քաշաթաղի ԶԿ), կրտսեր սերժանտ Տիգրան Արմենի Արզումանյանը (ծնվ. 1994թ., զինված ուժերում էր 2018թ.-ից, Սյունիքի ՄԶԿ) և կրտսեր սերժանտ Նվեր Տիգրանի Շահբազյանը (ծնվ. 1995թ., զինված ուժերում էր 2018թ.-ից, Սյունիքի ՄԶԿ): Պայմանագրային զինծառայող, շարքային Համլետ Գրենիկի Միրզոյանին (ծնվ. 1998թ., զինված ուժերում է 2018թ.-ից, Սյունիքի ՄԶԿ) հաջողվել է դուրս բերել ձյան շերտի տակից: Հայտնաբերված զինծառայողը ստացել է մարմնական թեթև վնասվածքներ, առողջական վիճակը գնահատվում է բավարար:

Ձյան սողանքի հետևանքով երեք պայմանագրային զինծառայողների մահվան և մեկի մարմնական վնասվածքներ ստանալու դեպքի առթիվ Քննչական կոմիտեում քրեական գործ է հարուցվել ծառայության նկատմամբ պետի կամ պաշտոնատար անձի անփույթ վերաբերմունքի հատկանիշով, եթե այն անզգուշությամբ առաջացրել է ծանր հետևանքներ։

Նարեկ Կիրակոսյան