Տասնապատիկ կրճատել ենք անտառհատման ծավալները․ կտրուկ և հաստատակամ ձևով ուղղակի կանգնեցրել ենք պրոցեսը․ Տավուշի մարզպետ

2019 թվականին ամենամեծ ձեռքբերումներից մեկը համարում ենք անտառի կառավարման ոլորտում կատարված արմատական փոփոխությունները։ Այս մասին լրագրողների հետ հանդիպման ժամանակ ասաց Տավուշի մարզպետ Հայկ Չոբանյանը։

Նա նկատեց, որ 30 տարի մեր երկրում անտառի թալանն ավելի գազանաբարո բնույթ է կրել։ Մարզպետն ընդգծեց, որ 2019 թվականին իրենք առաջին անգամ հատուկ, կտրուկ և հաստատակամ ձևով ուղղակի կանգնեցրել են այս պրոցեսը։

«Այս պրոցեսը կանգնեցնելը հեշտ չէ, որովհետև, գիտեք, հնչել են նաև մասնագիտական, փորձագիտական կարծիքներ, որ այս ոլորտում շրջանառվել է տարեկան առնվազն 500 մլն դոլար սև եկամուտ։ Եվ սա նշանակում է, ըստ էության, այս գործընթացը, որը սկսվեց և այսօր հաջողությամբ պահվում է, 500 մլն դոլար առնվազն սև եկամուտ ձևավորող, սև շուկայի և արդեն տասնամյակների ընթացքում ստեղծված կրիմինալ ենթակառուցվածքների դեմ գործընթաց էր։ Այսօր մենք շարունակում ենք մեր հաստատակամ քայլերն այն առումով, որ 2020 թվականի արդյունքներով արձանագրենք, որ անտառը պահվում է ոչ թե հատկապես ուժային կառույցների մասնակցությամբ, այլ անտառը պահվում է պրոֆեսիոնալ կառույցի մասնակցությամբ, որի խնդիրը հենց անտառի պահպանումը և կառավարումն է»,- ասաց մարզպետը։

Հայկ Չոբանյանը ցավով նշեց, որ դեռևս անտառի կառավարման համակարգի միջոցով ի վիճակի չեն այս պահպանության գործը լիարժեք իրականացնել և այդ պատճառով այս գործընթացի մեջ հատկապես ներգրավված են ՀՀ ոստիկանությունը և այլ ուժային կառույցներ։

«Իրականացվում է մեծ ծավալի օպերատիվ աշխատանք, որպեսզի մենք թույլ չտանք, որ այս անիվն այլևս հետ գնա։ Հայաստանում անտառներն այլևս գտնվում են պետական բացարձակ հոգածության և պաշտպանության ներքո։ Հայաստանում այլևս անօրինական անտառհատումը չի լինելու որպես պրոցես։ Այսօր կարող ենք հստակ արձանագրել հետևյալը, որ մենք կարողացել ենք առնվազն տասնապատիկ կրճատել անտառհատման ծավալները, և եթե տեղի են ունենում անօրինական անտառհատման դեպքեր, դրանց առնվազն 90 տոկոսը հայտնաբերվում է»,- ասաց Չոբանյանը՝ հավելելով, որ անտառվերականգման մեծ ծավալի աշխատանք է իրականացվել։