13.07.2026 | 23:14
ԵՄ-ն պատժամիջոցներ է սահմանել VK-ի նկատմամբ
Նախկին վարչապետ Հովիկ Աբրահամյանն արդեն 2-րդ տարին է՝ մեղադրյալ է, բայց ՀՔԾ-ում նախաքննությունը դեռ չի ավարտվել
Հասարակություն
05.02.2020 | 18:36
Չնայած կոռուպցիայի դեմ պայքարի շրջանակում ՀՔԾ-ն 2018 թ. սեպտեմբերի սկզբին մեղադրանք առաջադրեց ՀՀ նախկին վարչապետ Հովիկ Աբրահամյանին, որով նրան մեղադրեց Քրօրի 2 հոդվածներով՝ Factor.am-ը ՀՔԾ լրատվականից տեղեկացավ, որ այդ գործով նախաքննությունը դեռ շարունակվում է, գործը դեռ դատարան չի հասել:
Ընդ որում, խոսքը վերաբերում է նախկին վարչապետի կողմից բիզնես խլելուն՝ վարչական լծակներ կիրառելով: 2018-ի օգոստոսի 29-ին Քննչական կոմիտեն տեղեկացրեց, որ «Ավազահատիկ» ՍՊԸ-ի տնօրենի ներկայացրած հաղորդման հիման վրա հարուցված քրեական գործի շրջանակում պարզվել է, որ 2000 թ.-ին հիմնադրված ընկերությունը Արարատի մարզում զբաղվել է հանքարդյունաբերությամբ, սակայն 2008 թ.-ին բարձրաստիճան պաշտոնատար անձինք պահանջել են ընկերության բաժնեմասերի 60%-ը, ընդ որում, պահանջվել է այն ձևակերպել երկու տարբեր անձանց անունով՝ յուրաքանչյուրին 30%:
Նշվել էին նախկին վարչապետ Հովիկ Աբրահամյանի, նրա եղբոր՝ Հենրիկ (Ջոնիկ) Աբրահամյանի և ՀՀ նախկին ոստիկանապետ, ԱԺ պատգամավոր Ալիկ Սարգսյանի անունները։
«Ավազահատիկ» ՍՊԸ-ի շահագործած հանքը գտնվում է Արարատի մարզի Նորամարգ գյուղում: Ըստ իրավապահների՝ 2000 թվականին հիմանդրված ընկերությունը Արարատի մարզում զբաղվել է հանքարդյունաբերությամբ, ներգրավելով վարկային միջոցներ՝ կատարել է մեծ ներդրումներ, ձեռք է բերել ավազի լվացման և մաղման հոսքագծեր։ Սակայն 2008 թվականին բարձրաստիճան պաշտոնատար անձինք ստեղծել են արհեստական խոչընդոտներ, պահանջել ընկերության բաժնեմասերի 60 տոկոսը՝ սպառնալով, որ հակառակ պարագայում հանքերը չեն շահագործվի:
2008-ին Նորամարգ համայնքի ղեկավարը հայցադիմում էր ներկայացրել դատարան հողատարածքի վարձակալության վերաբերյալ, որտեղ ընկերությունը զբաղվում էր ավազի հանույթով, և պահանջել լուծարել «Ավազահատիկ»-ի տնօրենի հետ ավելի վաղ ստորագրված պայմանագիրը։ Դատարանը բավարարել էր հայցադիմումը, ինչից հետո նոր պայմանագիր է ստորագրվել տվյալ հողատարածքի վարձակալության վերաբերյալ այլ սեփականատերերի հետ։
Հովիկ Աբրահամյանը քրգործի հարուցումից հետո հայտարարեց, որ իր դեմ ակնհայտ շինծու գործ է հարուցվել՝ «նպատակ ունենալով լռեցնել ցանկացած այլակարծություն», քանի որ ինքը քննադատել է ներկա իշխանություններին:
Գլխավոր դատախազությունն այսօր Հովիկ Աբրահամյանի ընտանիքին վերաբերող մեկ այլ գործի մասին հայտնել է, որ Արարատի մարզի Մխչյան գյուղում հայտնաբերված ապօրինի զենք-զինամթերքի քրեական գործն ուղարկվել է դատարան։
Հիշեցնենք, որ նախկին վարչապետի եղբայրը՝ Հենրիկ Աբրահամյանը կալանավորվեց 2018-ի օգոստոսի 11-ին՝ ապօրինի զենք և զինամթերք պահելու համար: ԱԱԾ-ն գործարանային տարածքներից մեկում մի ամբողջ զինանոց հայտնաբերեց: Սակայն հետո նա ազատ արձակվեց կալանքից՝ 5 մլն գրավի դիմաց:
Մարինե Խառատյան
