Կրկին հետաձգվել է գյումրեցի կնոջ դաժան սպանության համար մեղադրվող ռուս զինծառայողի դատը

Գյումրեցի 57-ամյա Ջուլիետա Ղուկասյանի սպանության համար մեղադրվող ռուսական 102-րդ ռազմաբազայի զինծառայող Անդրեյ Ռազգիլդեևի դատավարությունն արդեն 5-րդ անգամ հետաձգվեց։ Այս անգամ նիստը հետաձգվեց ռուսական ռազմաբազայի հրամանատար Ն․Մարտինյուկի միջնորդության հիման վրա, ըստ որի, ռուսական կողմը Ռազգիլդեևի և նրան ուղեկցող անձանց անվտանգությունն ապահովելու երաշխիքներ չի ստացել։ Հաջորդ դատական նիստը նշանակվել է մարտի 6-ին։

Նշենք, որ նախորդ նիստը պետք է կայանար հունվարի 14-ին։ Ոստիկանությունը գրություն էր ուղարկել դատարան, որ ծանրաբեռնվածության պատճառով չի կարող ուղեկցող ոստիկաններ տրամադրել մեղադրյալին ռազմաբազայից տեղափոխելու համար ու նիստը չէր կայացել:

Ավելի վաղ, սեպտեմբերի 6-ին կայանալիք նիստը հետաձգվել էր Շիրակի մարզի դատախազ Կարեն Գաբրիելյանի արձակուրդում լինելու պատճառով, հեկտեմբերի 25-ին էլ՝ դատախազի միջնորդության պատճառով, իսկ նոյեմբերի 28-ի նիստն էլ հետաձգվել էր դատավոր Ադրինե Ղուկասյանի վատառողջ լինելու պատճառով։

Հիշեցնենք, որ Անդրեյ Ռազգիլդեևին մեղադրանք է առաջադրվել այն բանի համար, որ նա 2018 թվականի դեկտեմբերի 2-ին` ժամը 7-ի սահմաններում, ալկոհոլի ազդեցության տակ գտնվելով, Գյումրի քաղաքի Մայակովսկի փողոցում տեսնելով Ջուլիետա Ստյոպայի Ղուկասյանին, հետևել է նրան, ապա նրան հասնելով դիտավորությամբ բազմաթիվ հարվածներ է հասցրել գլխին և մարմնի տարբեր մասերին` պատճառելով մարմնական վնասվածքներ: Ջուլիետա Ղուկասյանը «Գյումրի շտապբուժօգնություն ծառայություն» ՓԲ ընկերության ավտոմեքենայով տեղափոխվել է բժշկական կենտրոն, որտեղ նույն օրը մահացել է։

Էմմա Չոբանյան