17.09.2026 | 23:38
Սամվել Կարապետյանի տնային կալանքը երկարաձգվել է
Պենտագոն. հայ-ամերիկյան ռազմական համագործակցությունն ակտիվորեն զարգանում է. VOA
Քաղաքականություն
31.01.2020 | 10:47
Հայ-ամերիկյան ռազմական համագործակցությունն ակտիվորեն զարգանում է, Ամերիկայի ձայնի փախանցմամբ՝ Վաշինգտոնում Հայաստանի դեսպանատանը ելույթ ունենալով Հայկական բանակին նվիրված տոնին, հայտարարել է ԱՄՆ-ի պաշտպանության նախարարի Ռուսաստանի, Ուկրաինայի և Եվրասիայի հարցերով օգնականի տեղակալ Լորա Քուփերը. «Ակտիվորեն զարգացող համագործակցությունը մեր Զինված ուժերի միջև իրական ոգևորություն է առաջացնում: Մեզ համար պատիվ է ընդունել Հայաստանից ուսանողների՝ ռազմական կրթություն տալով նրանց: Այս տարի մենք նախատեսում ենք նաև զարգացնել համագործակցությունը Հայաստանի ազգային պաշտպանության հետազոտությունների համալսարանի հետ, ինչպես նաև շարունակել կրթել Հայաստանի Զինված ուժերի ներկա և ապագա առաջնորդներին»:
Քուփերի խոսքով, պաշտպանության ոլորտում երկկողմ համագործակցության հիմքում Հայաստանի և Կանզաս նահանգի միջև ընդլայնվող գործընկերությունն է. «Կանզասի հետ ընթացող ծրագիրը թույլ է տալիս մեծացնել Հայաստանի ու ՆԱՏՕ-ի գործունակությունը, դյուրացնել պաշտպանական ոլորտի բարեփոխումները Հայաստանում»:
Հայ-ամերիկյան ռազմական գործընկերության մասին խոսեց նաև ԱՄՆ-ում Հայաստանի դեսպան Վարուժան Ներսեսյանը, ընդգծելով՝ համագործակցությունն ընթանում է ինչպես երկկողմ, այնպես էլ՝ բազմակողմ շրջանակներում. «Հայաստանի և Միացյալ Նահանգների միջև անցյալ տարի նախաձեռնված ռազմավարական երկխոսությունը հարթակ է տրամադրում համընդհանուր բանակցությունների համար, այդ թվում և՝ ռազմաքաղաքական ոլորտի գործընկերության ոլորտում»:
«Պաշտպանության նախարարության անունից ցանկանում եմ հատուկ նշել Հայաստանի անձնվեր ներդրումը իր սահմաններից դուրս կայունության և անվտանգության պահպանման գործում: Աֆղանստանում 120 հայաստանցի զինվորական ապահովում են պաշտպանություն Մազարի Շարիֆում, ներդրում կատարելով Աֆղանստանի ժողովրդին խաղաղություն ու անվտանգություն բերելու գործին: Կոսովոյում ՆԱՏՕ-ի ուժերի շրջանակներում 41 հայաստանցի զինվորականներ կարևորագույն ներդրում են կատարում Արևմտյան Բալկաններում կայունության և անվտանգության պահպանման գործում»:
Հայաստանի խաղաղապահ ուժերը գործում են աշխարհի տարբեր հատվածներում, իր ելույթում նշեց ԱՄՆ-ում Հայաստանի դեսպանության ռազմական կցորդ, գնդապետ Արման Մկրտչյանը. «Մեր դաշնակիցների և գործընկերների միջև համագործակցությունը, հատկապես՝ ԱՄՆ-ի ու Ռուսաստանի հետ, ՆԱՏՕ-ի և ՀԱՊԿ-ի շրջանակներում, շարունակում է կարևոր դեր խաղալ ներքին պաշտպանական բարեփոխումների և մեր պաշտպանական ռազմավարության համար»:
