Եթե Նիկոլ Փաշինյանի «կոստյումի» գրպանում ցեց է, մեկ է՝ դա Սերժ Սարգսյանի հագով էր կարված. Գևորգ Գորգիսյան. ՏԵՍԱՆՅՈՒԹ

Իշխանությունները չունենալով դատաիրավական համակարգը բարեփոխելու կարողություններ՝ կենտրոնացել են Հրայր Թովմասյանի վրա, և եթե նա հրաժարական տա, դա ոչինչ չի տալու մեր հանրությանը: Այս մասին Factor TV-ի հետ զրույցում նշեց ԱԺ «Լուսավոր Հայաստան» խմբակցության քարտուղար Գևորգ Գորգիսյանը:

Դիտարկմանը, որ նա նախկին իշխանության ներկայացուցիչ է եղել և կարող է ՍԴ-ի որոշումների վրա ազդեցություն ունենալ, Գևորգ Գորգիսյանն ասաց. «Ես կասկածում եմ, որ Հրայր Թովմասյանը կարող է ՍԴ-ի որոշումների վրա ազդեցություն ունենալ, որովհետև այն կոլեգիալ մարմին է: Այն քաղաքացիները, որոնք դուրս էին եկել փողոց, նպատակը միայն Նիկոլ Փաշինյանին վարչապետ դարձնելը չէր: Հանրությունն ուզում էր լրջագույն փոփոխություններ, լճացած իրավիճակից դուրս գալու քայլեր»:

-ՍԴ նախագահի փոփոխությունն այդ լրջագույն փոփոխություններից չէ՞:

-Մենք չգիտենք, թե Հրայր Թովմասյանի հրաժարականը, որքանով է հանրության պահանջը: Թողած բազմաթիվ խնդիրներ, որոնց առաջ կանգնած ենք:

-Դուք չգիտեք, թե հանրության մեծ մասն ի՞նչ կարծիք ունի Հրայր Թովմասյանի մասին:

-Եթե մենք ֆեյսբուքով ենք չափում, ապա ֆեյսբուքում պահանջում են ինձ վառել:

-Իշխանությունը պատճառ է նշում՝ ասում են Հրայր Թովմասյանը խախտումներով է ընտրվել:

-Դա Նիկոլ Փաշինյանի կարծիքն է, դա փաստ չէ, եթե կան փաստեր, ապա ոչ մեկ չի բռնել Դատախազության կամ ՀՔԾ-ի ձեռքը…

-Գագիկ Հարությունյանի վաղաժամ հրաժարականը փաստ չէ՞ր:

-Օրենքի տառին համապատասխան էր: Մենք դա ժամանակին քննադատել ենք, դեմ ենք քվեարկել: Դա չի նշանակում, որ հիմա կարելի է օրենք խախտել:

-Դո՞ւք էլ եք կարծում, որ նա քաղաքական հետապնդման է ենթարկվում:

-Հրայր Թովմասյանի հրաժարականի գործընթացը դարձել է քաղաքական: Ամբողջ քաղաքական թիմը էներգիան ծախսում է նրա դեմ, Հրայր Թովմասյանին դարձել են հերոս:

Հարցազրույցն ամբողջությամբ՝ տեսանյութում:

Նարեկ Կիրակոսյան