18.10.2026 | 14:00
Ֆրանսիայում բողոքի ցույցեր են․ կես միլիոնից ավելի մասնակից, ավելի քան 1200 ձերբակալված
Ոչ մի մեծ պատմություն չի կերտվում ստի և ժխտողականության վրա․ Մակրոնը խոսել է Հայոց ցեղասպանության մասին
Քաղաքականություն
30.01.2020 | 12:26
Արդեն 19 տարի է՝ Ֆրանսիան լծված է Հայոց ցեղասպանության ճանաչման գործին: Ապրիլի 24-ը Ֆրանսիայում Հայոց ցեղասպանության հիշատակի ազգային օր դարձնելու խոստումը կատարված է։ Այս մասին ասել է Ֆրանսիայի նախագահ Էմանուել Մակրոնը՝ Ֆրանսիայի հայկական կազմակերպությունների համակարգող խորհրդի տարեկան ընթրիքին ունեցած ելույթում:
Անդրադառնալով Հայոց ցեղասպանության միջազգային ճանաչման գործընթացին, Մակրոնը նշել է․ «Պայքարը, որ հայերը մղում են Ցեղասպանության ճանաչման համար, պայքար է նաև լռության ու մոռացության դեմ: Ճշմարտության հարցում հայ և ֆրանսիացի ժողովուրդների միջև եղբայրություն կա»:
Ֆրանսիայի նախագահն ընդգծել է, որ Թուրքիան իր քաղաքականության հիմքում դրել է ժխտողականությունը:
«Ոչ մի մեծ պատմություն չի կերտվում ստի և ժխտողականության վրա»,- ասել է Մակրոնը:
Հիշեցնենք, որ 2019-ի փետրվարի 5-ին Էմանուել Մակրոնը հայտարարել էր, որ ապրիլի 24-ը Ֆրանսիայում նշվելու է որպես Հայոց ցեղասպանության հիշատակի օր: Ֆրանսիան Հայոց ցեղասպանությունը ճանաչել է 2001 թվականին:
Նելլի Մելքոնյան
