Վարդան Ոսկանյանը հերքում է, որ Արթուր Վանեցյանի գրանցած հիմնադրամի հոգաբարձուների խորհրդի անդամ է

ԵՊՀ իրանագիտության ամբիոնի վարիչ, գիտությունների թեկնածու Վարդան Ոսկանյանը հերքում է տեղեկությունները, որ նա հանդիսանում է ԱԱԾ նախկին տնօրեն Արթուր Վանեցյանի կողմից հիմնադրված «Հայրենիք» հիմնադրամի հոգաբարձուների խորհրդի անդամ: Այս մասին նա նշեց Factor.am-ի հետ զրույցում, երբ փորձեցինք հետաքրքրվել, թե ինչ փուլում են գտնվում հիմնադրամի աշխատանքները:

«Դա ապատեղեկատվություն է, ես որևէ կապ չունեմ: Կարծեմ Իրանում էի, երբ ինձ ասացին, որ նման հրապարակում է եղել: Որևէ արձագանք չեմ տվել, որովհետև անիմաստ եմ համարում արձագանքելը»,- նշեց Ոսկանյանը:

Հիշեցնենք, որ Արթուր Վանեցյանի ստեղծած հիմնադրամն արդարադատության նախարարության պետական ռեգիստրում գրանցվել էր նոյեմբերի 27-ին:

«Ազատություն» ռ/կ-ն գրել էր, որ «Հայրենիք» զարգացման հիմնադրամի հոգաբարձուների խորհրդի անդամներն են գեներալ-մայոր Արթուր Վանեցյանը, ԵՊՀ իրանագիտության ամբիոնի վարիչ, գիտությունների թեկնածու Վարդան Ոսկանյանը և ԵՊՀ կիրառական սոցիոլոգիայի ամբիոնի վարիչ, քաղաքական գիտությունների դոկտոր Արթուր Աթանեսյանը։ Հիմնադրամի կանոնադրության մեջ «Նպատակներ» բաժնում գրված է՝ «աջակցել ժողովրդավարության ամրապնդմանը նպաստող ծրագրերին»:

Ճշտող հարցին՝ արդյոք հնարավոր է, որ եղել է հոգաբարձուների խորհրդի կազմում, բայց հետո դուրս է եկել, Վարդան Ոսկանյանը բացասական պատասխան տվեց:

Ուշագրավ է, որ Վարդան Ոսկանյանը, չլինելով Արթուր Վանեցյանի հիմնադրամի անդամ, դեմ էր, որպեսզի այդ մասին հրապարակում անենք:

«Չեմ կարող ասել, թե ինչն է պատճառը եղել, որ իմ անունը կապել են հիմնադրամի հետ: Անիմաստ տեղը շոշափելով՝ վտանգում ենք մեր երկիրը»,- նշեց նա, այդպես էլ, սակայն, չպարզաբանելով, թե ինչպես կարող էր ժողովրդավարության ամրապնդմանը նպաստող ծրագրերի իրականացմանն ուղղված հիմնադրամի հոգաբարձուների խորհրդի անդամ լինելը ու վտանգել մեր երկիրը։

Նարեկ Կիրակոսյան