«Ռեստարտ» խմբի անդամների անձնագրերը դատարանը վերադարձրեց․ նիստը հետաձգվեց

ՀՀ նախկին ոստիկանապետ Վլադիմիր Գասպարյանի նախկին օգնական Նարեկ Մալյանին աղբամանը նետելու փորձի գործով այսօրվա դատական նիստը հետաձգվեց։ Տուժող կողմի ներկայացուցիչ Տիգրան Աթանեսյանն էր դատարանին նման գրավոր միջնորդություն ներկայացրել։ Տուժողներից ոչ ոք նիստին չէր ներկայացել։

Մինչ դատական նիստը կավարտվեր «Ռեստարտ» խմբի անդամները և նրանց ներկայացուցիչը միջնորդեցին դատարանին վերադարձնել խմբի անդամների անձնագրերը և հարուցված քրեական գործը կարճել։

Խմբի անդամներից Դավիթ Պետրոսյանը դատարանում ասաց․ «Մենք շատ հետաքրքրված և մոտիվացված ենք, որ այս գործը վերջապես քննվի, ու մենք այս երկրից ոչ միայն բացակայելու մտադրություն չունենք, այլ նաև այնքան ժամանակ երկրից չենք բացակայի, քանի դեռ այս հարցն ու մի շարք այլ հարցեր չեն լուծվել։ Մեզ համար շատ վիրավորական է, որ դատախազը, կամ Ոստիկանությունը, կամ որևէ մեկը կարող է կարծել, որ մենք կարող ենք երկրից բացակայել, որպեսզի մեր ենթադրյալ կատարած հանցանքի համար պատիժ չկրենք»։

Դավիթ Պետրոսյանն ասաց, որ անձնագրի բացակայության պայմաններում երկրի ներսում էլ բազմաթիվ խնդիրների են բախվում, սկսած բանկերում գործարքներ կատարելուց։

Դատարանը որոշեց խմբի անդամների անձնագրերը վերադարձնել, սակայն գործը կարճելու միջնորդությունը ասաց չի կարող քննել, այն վերաբերվում է նաև տուժող կողմին, և նրանք ևս այս հարցի քննարկմանը պետք է մասնակցեն։

Դավիթ Պետրոսյանը դատարանում նաև դատարանի և մեղադրող դատախազի ուշադրությունը հրավիրեց գործով տուժող ճանաչված Նարեկ Մալյանի վարքագծի վրա։ Պետրոսյանն ասաց, ինչպես դեպքից առաջ, այնպես էլ դրանից հետո տուժող ճանաչված անձը հայհոյախառն արտահայտություններ է հնչեցնում խմբի անդամների հասցեին։ Դատախազն ի պատասխան սրա ասաց․ «Դատախազությունը որպես քրեական հետապնդում իրականացնող մարմին, յուրաքնաչյուր դեպքով, հանցագործության հատկանիշներ պարունակող յուրաքանչյուր հաղորդում պարտավոր է և պատշաճ կերպով իրականացնում է համապատասխան գործողություն։ Եթե կան փաստական տվյալներ, խնդրեմ կարող եք ներկայացնել»։

Դատական նիստը հետաձգվեց։ Հաջորդ նիստի օրը դեռևս հայտնի չէ։ Ըստ մեղադրական եզրակացության՝ 6 երիտասարդները, նախնական համաձայնության գալով 2019թ. մարտի 4-ին՝ ժամը 00:40-ի սահմաններում, Երևան քաղաքի Ամիրյան փողոցի 18 հասցեում փորձել են առևանգել Նարեկ Մալյանին, սակայն հանցագործությունն ավարտին չեն հասցրել՝ իրենց կամքից անկախ հանգամանքներով: Գործով ամբաստանյալի կարգավիճակում են Դավիթ Պետրոսյանը, Գարիկ Միսկարյանը, Յուրի Ավագյանը, Դավիթ Սիմոնյանը, Հրաչյա Խլղաթյանը, Արամայիս Պետրոսյանը: Երիտասարդները պնդում են, թե ցանկացել են Մալյանին աղբամանը նետել իրենց հասցեին անվայել արտահայտություններ հնչեցնելու համար։

Լիլիթ Շաբոյան