Զինվորի հայրենասիրությունը որքան էլ ցանկանան կոտրել՝ չեն կարող. ադրբեջանական ուղղաթիռը խոցած ապրիլյանի մասնակից

Բանակի օրվա առթիվ Factor.am-ը զրուցել է ապրիլյան քառօրյա պատերազմի մասնակից, ԼՂՀ «Մարտական խաչ» երկրորդ աստիճանի շքանշանակիր Գևորգ Մանուկյանի հետ։

Գևորգը ծառայել է Արցախի «Եղնիկներ» զորամասում։ Ապրիլի 1-ի, լույս 2-ի գիշերը նա խոցել է մարտական դիրքերի ուղղությամբ հրթիռներ արձակող ադրբեջանական ուղղաթիռը՝ այդպիսով կանխելով թե՛ մարդկային և թե՛ տարածքային կորուստները:

-Գևորգ, ներկայում բանակում առկա իրավիճակը, վերջին բարեփոխումները՝ կապված սննդի հետ, զենքի ձեռքբերումն ինչպե՞ս կգնահատեք։

-Ամեն ինչ լավ է։ Դրական փոփոխությունները միշտ էլ լավ են ազդում բանակի վրա։ Բանակն անընդհատ զարգացող օրգանիզմ է։ Եվ փոփոխությունները միշտ պետք են ու միշտ էլ լինելու են։

-Ապրիլյան քառօրյա պատերազմի վերաբերյալ զինվորները տարատեսակ կարծիքներ էին հայտնում։ Մի քանիսն իրենց հրապարակային խոսքում չեն բացառել, որ պատերազմը կարող էր պայմանավորված լինել։ Ձեր տեսակետը ո՞րն է։

-Հիմա եթե մենք մտածենք, որ դա պայմանավորված պատերազմ էր, արդյունքում որքանո՞վ է մեզ համար արժևորվելու հայրենիքը և մեր արածը։ Եթե, օրինակ, ես պարզեմ կամ նման կանխավարկած ունենամ, որ պատերազմը պայմանավորված էր, որքանո՞վ եմ երաշխավորված, որ հաջորդ անգամ պայմանավորված չի լինելու։ Եթե պայմանավորված պատերազմ լինի, այդ դեպքում պետք է մտածեմ՝ ով պայմանավորվել է, թող ինքն էլ գնա, պաշտպանի՞ հայրենիքը։ Անձամբ ինձ դա չի հետաքրքրում՝ պատերազմը պայմանավորվածությա՞ն արդյունք էր, թե՞ ոչ։ Դա ընդհանրապես կապ չունի զինվորի համար։ Եթե պայմանավորվածության արդյունքում են ադրբեջանցիները հարձակվում, ուրեմն չպե՞տք է պաշտպանենք հայրենիքը։

-Գլխավոր գործոնը ո՞րն էր, որ նպաստեց և զինվորները կարողացան հակահարված տալ հակառակորդին։

-Երևի հրամանատարական կազմը, քանի որ առաջ մղող առաջին գործոնը բարձր պատրաստվածությամբ հրամանատարական կազմն է, զինվորի մեջ եղած հայրենասիրությունը, որ որքան էլ ցանկանան կոտրել՝ չեն կարող։ Մեր հետագիծը միշտ էլ ցույց է տվել, որ զինվորները միշտ պատրաստ են վտանգների դիմակայել։

-Եվ Ձեր մաղթանքն օրվա առթիվ բանակին, զինվորներին։

-Մաղթում եմ, որ միշտ լինեն իրենց տեղում, պատրաստ, մարտունակ։ Բարի ծառայություն եմ մաղթում բոլոր զինվորներին։

Մերի Մարտիրոսյան