Առաջին անգամ ատելության խոսք տարածողը հեռացվեց իշխանությունից. մինչ այս՝ «ականջ ծամելն» անարձագանք էր. ՏԵՍԱՆՅՈՒԹ

Երևանի ավագանու «Իմ քայլը» խմբակցության անդամ Հենրիկ Հարթենյանը զրկվեց մանդատից՝ ատելության խոսք տարածելու պատճառով: Իշխող խմբակցությունն այսօր հրատապ նիստ էր հրավիրել, որտեղ 3 ժամ քննարկեցին ավագանու անդամի նախորդ օրվա գրառումը:

Հիշեցնենք, ավագանու 21-ամյա անդամը երեկ ֆեյսբուք սոցիալական ցանցի «սթորի» բաժնում տեղադրել էր Սառա Թովմասյան օգտատիրոջ էջի լուսանկարը և գրել. «Ժողովուրդ, սա Հրայր Թովմասյանի աղջկա էջն է, դե՝ ձեզ տեսնեմ»: Իմքայլականները նրա քայլը դատապարտեցին:

Թե որն էր Հենրիկ Հարթենյանի գրառման նպատակը՝ ավագանու «Իմ քայլը» խմբակցության ղեկավար Սուրեն Էյրամջյանը Factor TV-ի հարցին ի պատասխան ասաց, որ այդ մասին Հենրիկ Հարթենյանը հայտարարությամբ հանդես կգա: Հենրիկ Հարթենյանի հետ խոսել չհաջողվեց նիստից հետո քաղաքապետարանի շենքը լքել էր հետնամուտքով, իսկ մեր զանգերն անպատասխան թողեց: Հենրիկ Հարթենյանը Երևանի ավագանու գործունեության մեկ տարվա ընթացքում ո՛չ ելույթ է ունեցել, ո՛չ էլ հարց հնչեցրել:

Ավելի ուշ նա ֆեյսբուքյան հայտարարությամբ հանդես եկավ, որը խմբագրել էր վեց անգամ: Հենրիկ Հարթենյանն իր էջում գրել էր. «Սիրելի հայրենակիցներ, ելնելով ստեղծված իրավիճակից՝ հայցում եմ ձեր ներողամտությունը և անհամատեղելի եմ համարում աշխատանքս Երևան քաղաքի ավագանիում՝ ուստի վայր եմ դնում մանդատս»։

Ուշագրավ է, որ «Իմ քայլը» խմբակցության ներկայացուցչն այս գրառումը կատարեց այն ժամանակ, երբ ֆեյսբուքահայությունն ակտիվ քննարկում էր Նիկոլ Փաշինյանի կողմից Հրայր Թովմասյանի քծնանքի վերաբերյալ հրապարակված հուժկու ապացույցները:  Ավելի ուշ սոցցանցերում օգտատերերը հայտնեցին, որ Սառա Թովմասյանը ՍԴ նախագահ Հրայր Թովմասյանի դուստրը չէ: Սառա Թովմասյանը ապաակտիվացրել է էջը՝ ֆեյսբուքյան գրոհի պատճառով:

Այնուհանդերձ, «Իմ քայլում» կային անդամներ, որոնք կարծում էին, թե Հենրիկ Հարթենյանը մանդատից չպետք է հրաժարվի:

Նշենք, որ սա առաջին դեպքը չէ, որ Երևանի ավագանու «Իմ քայլը» խմբակցության անդամները հրապարակային գրառման հետևանքով սկանդալի կենտրոնում են հայտնվում: 2018 թվականի հոկտեմբերին երգիչ, ավագանու անդամ Արթուր Իսպիրյանը ֆեյսբուքի մեկնաբանությունների բաժնում որդեկորույս կնոջ բողոքի մասին պատմող կայքերից մեկի հրապարակումը մեկնաբանել էր՝ «Գիժ անտեր»: Նա, սակայն, ավագանու մանդատից չզրկվեց:

2019 թվականի սեպտեմբերին էլ «Իմ քայլը» խմբակցության անդամ Նվարդ Վարդանյանը ֆեյսբուքի իր էջում գրել էր, որ անհրաժեշտության դեպքում հատ-հատ բոլորի ականջները կծամի, եթե վախի մթնլորտ ստեղծեն: Նա ևս մինչ այսօր շարունակում է Երևանի ավագանու կազմում լինել՝ այդպես էլ չմեկնաբանելով, թե իր գրառումն ու՞մ է ուղղված:

«Քաղաքացիական պայմանագիր» կուսակցության համակիրներից Վազգեն Մանուկյանն էլ, որն աշխատում է Աջափնյակի թաղապետարանում, երգչուհի Նադեժդա Սարգսյանի մահվան կապակցությամբ գրել էր. «Մի Սարգսյան էլ հեռացավ ու բոլոր Սարգսյանները պիտի հեռանան»:

Հենրիկ Հարթենյանի դեպքն առաջինն է, երբ իշխանություններն ատելության խոսք տարածելու համար կարգապահական քայլերի են դիմում:

Մանրամասները՝ տեսանյութում:

Նարեկ Կիրակոսյան