11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Ինքն իր պատճառաբանությունն ունի, հուսով եմ արդարացի է. ավագանու անդամը՝ Թովմասյանի դստեր էջի մասին. ՏԵՍԱՆՅՈՒԹ
Քաղաքականություն
27.01.2020 | 11:57
Մենք բոլորս դատապարտել ենք բռնության կոչերը, նմանատիպ դրսևորումները: Այս մասին, այսօր՝ հունվարի 27-ին, լրագրողների հետ զրույցում նշեց Երևանի ավագանու «Իմ քայլը» խմբակցության անդամ Արման Անտոնյանը՝ անդրադառնալով իրենց խմբակցության անդամ Հենրիկ Հարթենյանի ֆեյսբուքյան գրառմանը:
Հարցին, թե իր կարծիքով Հարթենյանը պետք է հեռանա ավագանու կազմից, Անտոնյանն արձագանքեց. «Թույլ տվեք այս պահին իմ սուբյեկտիվ կարծիքը չհայտնեմ, մենք այսօր կորոշենք և հայտարարությունը կտարածենք: Միանշանակ հարցեր տալու ենք, ինքն իր մեկնաբանությունն ունի, պատճառաբանությունն ունի, շատ մեծ հույս ունեմ, որ արդարացի է: Դե ցանկացած մարդ ունի իր արդարացումը: Ինքս խիստ դատապարտում եմ, բայց քանի դեռ մեր նիստը չի կայացել, ես որևէ հայտարարություն չեմ կարող անել»:
«Իմ քայլի» անդամը հավելեց, որ ցանկացած արդարացում, ինչպիսին էլ այն լինի, ընդունելի չի լինի: «Մեր երկրում բռնության կոչեր չպետք է լինեն, որ կողմից էլ լինի»,-ընդգծեց Անտոնյանը:
Հիշեցնենք, որ «Իմ քայլը» խմբակցության անդամ Հենրիկ Հարթենյանն իր ֆեյսբուքյան էջում տեղադրել է Հրայր Թովմասյանի դստեր նկարը և գրել. «Հ. Թովմասյանի աղջկա ֆբ-ն ա, ձեզ տեսնեմ ժողովուրդ ջան»:
Սա քննադատությունների առարկա էր դարձել սոցիալական ցանցերում: Ավելի ուշ գրառում կատարող ավագանու անդամը ջնջել էր իր ֆեյսբուքյան էջը:
Նշենք, որ դրանից հետո Երևանի ավագանու «Իմ քայլը» խմբակցությունը հայտարարություն էր տարածել, որ այսօր հրատապ նիստ է գումարում, որից հետո հանդես կգա հայտարարությամբ: «Խստորեն դատապարտում ենք ատելության խոսքի ցանկացած դրսևորում: Հայցում ենք ձեր ներողամտությունը կատարվածի առթիվ: Վաղը «Իմ քայլը» խմբակցությունը կգումարի հրատապ նիստ, որից հետո հանդես կգանք հայտարարությամբ»,- ասվում է հայտարարությունում։
Մանրամասները ՝ տեսանյութում:
