«Գազպրոմ Արմենիան» քննարկում է գազի գնի վերանայման հայտով ՀԾԿՀ դիմելու հարցը

«Հանրային ծառայությունները կարգավորող հանձնաժողովն այս պահի դրությամբ «Գազպրոմ Արմենիայից» գազի գնի բարձրացման հայտ չի ստացել»,- Factor.am-ի հետ զրույցում ասաց ծառայության մամուլի քարտուղար Լիանա Ազիզյանը։

«Հանձնաժողով այդպիսի հայտ մուտքագրված չէ։ Մինչ հայտի մուտքագրումը «Գազպրոմ Արմենիան» պարտավոր է ծանուցել բնակչությանը՝ հրապարակումներ կատարելով իր պաշտոնական կայքում, ինչպես նաև azdarar.am-ում։ Երբ հայտը «Գազպրոմ Արմենիան» բերի հանձնաժողով, մենք էլ կծանուցենք դրա ստացման վերաբերյալ»,- ասաց նա:

«Գազպրոմ Արմենիայի» մամուլի պատասխանատու Միխայիլ Հարությունյանը Factor.am-ին փոխանցեց․ «Սակագնի վերանայման հարցը ընկերությունում քննարկվում է, չի բացառվում, որ «Գազպրոմ Արմենիան» կդիմի Հանրային ծառայությունները կարգավորող հանձնաժողով՝ համապատասխան հայտով»։

Հարցին՝ գազի սակագնի ի՞նչ վերանայման մասին է խոսք գնում, Հարությունյանը չհստակեցրեց՝ խոստանալով հետագայում մանրամասն տեղեկացնել, եթե որոշվի հայտով դիմել հանձնաժողով։

Նշենք, որ խոսքը վերաբերում է գազը սպառողի համար թանկացնելու հավանականությանը։ Անցած տարեվերջին ռուսական «Գազպրոմ» ընկերությունը հայտարարություն էր տարածել, ըստ որի՝ «Գազպրոմ Էքսպորտ»-ը և «Գազպրոմ Արմենիա» ՓԲԸ-ն Հայաստանի Հանրապետություն ռուսական գազի մատակարարման շուրջ պայմանագրին հավելյալ համաձայնագիր են ստորագրել, համաձայն որի՝ 2020 թվականի հունվարի 1-ից գազի գինը Վրաստանի և Հայաստանի սահմանում կպահպանվի 2019 թվականի պայմաններով, այսինքն՝ Հայաստան առաքվող գազի գինը չի բարձրանա։

Հիշեցնենք, որ ռուսական «Գազպրոմը» 2019 թվականի հունվարի 1–ից բարձրացրել է գազի գինը Հայաստանի համար` 1000խ/մ-ի դիմաց 150 դոլարի փոխարեն սահմանելով 165 դոլար։

Ռոբերտ Անանյան