Ինքնադատաստա՞ն, թե՞ պատահականություն․ Ոստիկանությունը հետաքննում է «Երևան սիթի»-ի մենեջերի սենյակում մահացած քաղաքացու գործը

Գործարար Սամվել Ալեքսանյանին պատկանող Մաշտոցի պողոտայի «Երևան սիթի» խանութում մոտ մեկ ամիս առաջ՝ դեկտեմբերի 19-ի երեկոյան մահացած հայտնաբերված քաղաքացու գործով Ոստիկանության քննչական բաժնում հետաքննություն է ընթանում, դեռ սպասում են դատաբժշկական փորձաքննության եզրակացությանը՝ պարզելու, թե ինչի արդյունքում է մահացել քաղաքացին։ Այս մասին Factor.am-ի հարցմանն ի պատասխան տեղեկացրին ՀՀ  ոստիկանության լրատվական ծառայությունից։

Նշենք, որ դեպքի օրը ոստիկանները պարզել էին, որ մահացածը 58-ամյա Լևոն Բ.-ն է, որը նշված սուպերմարկետում 26-ամյա աղջկա սայլակի միջից գողացել էր նրա պայուսակը, ինչը նկատել էին անվտանգության աշխատակիցները: Ըստ վերջինների՝ իրենք կասկածյալին ուղեկցել էին մենեջերի աշխատասենյակ, որտեղ նա հանկարծամահ էր եղել:

Այժմ ոստիկանությունը պետք է քննությամբ պարզի՝ կա՞ն ինքնադատաստանի տարրեր խանութի անվտանգության գործողություններում, թե՞ ոչ և, ի վերջո, ինչի՞ արդյունքում է մահացել քաղաքացին։

Նշենք, որ նախկինում մամուլում եղել են հրապարակումներ Սամվել Ալեքսանյանի խանութներում պատժիչ գործողությունների մասին։ Իսկ գրեթե երեք տարի առաջ Մոսկվայում սպանվեցին ՀՀ երկու քաղաքացիներ՝ «Ձկնկուլ» մականունով Արմեն Իսրայելյանը և Էդուարդ Նշանյանը: Նրանք երկուսն էլ աշխատել էին հայտնի գործարար  Սամվել Ալեքսանյանին պատկանող ընկերություններում, իսկ Իսրայելյանը Ալեքսանյանին մեղադրում էր իրեն առևանգելու և ունեզրկելու մեջ: Այդ սպանությունների պատասխանատուները այդպես էլ չբացահայտվեցին:

Մարինե Խառատյան