Հնարավոր է՝ ՌԴ կառավարության նոր ղեկավարը լինի երկրի հաջորդ նախագահը. քաղաքագետները՝ ՌԴ կառավարության հրաժարականի մասին

ՌԴ կառավարությունն այսօր հրաժարական տվեց և, ըստ քաղաքագետ Ստեփան Դանիելյանի, այժմ հիմնական խնդիրն այն է, թե ով է լինելու վարչապետը:

Նրա կարծիքով՝ հնարավոր է, որ այդ մարդը հետագայում լինի հաջորդ նախագահը՝ Պուտինի ենթակայության տակ:

«Բոլորը սպասում են՝ ով է լինելու կառավարության ղեկավարը, և նա լինելու է շատ կարևոր դեմք: Հնարավոր է՝ հետագայում հաջորդ նախագահը լինի»,- Factor.am-ի հետ զրույցում նկատեց քաղաքագետը:

Ստեփան Դանիելյանի դիտարկմամբ՝ ռուսական մամուլում տեղ գտած քննարկումներից ելնելով՝ կարելի է ասել, որ ակնհայտորեն իշխանության վերափոխման գործընթաց է գնում, ինչը բավականին լուրջ և ծանր պրոցես է:

«Իշխանությունում շատ կարևոր դեր է կատարելու Անվտանգության խորհուրդը, և մոտավորապես սա կարող է հիշեցնել Ղազախստանում իշխանության փոփոխության դեպքերը, երբ Նազարբաևն այլևս նախագահ չէ, բայց, ըստ էության, ղեկավարում է երկիրը։ Այստեղ զարգացումները կարող են շատ տարբեր լինել, կարող է անսպասելի ընտրություններ լինեն և այլն: Կարևոր է, որ սահմանադրական փոփոխությունները հանրաքվեով են անցկացնելու, չնայած դրա զգալի հատվածը կարող էին Դումայում անցկացնել: Սա նշանակում է, որ այդ փոփոխությունները հետագայում Դուման չի կարող վերափոխել, ասենք՝ քվեարկության միջոցով»,- նկատեց Ստեփան Դանիելյանը։

Քաղաքագետ Ստեփան Գրիգորյանն էլ կարծում է, որ ՌԴ կառավարության հրաժարականը ոչ մի էական փոփոխության չի բերի:

«Ռուսաստանի նախագահը Վլադիմիր Պուտինն է, այնտեղ նախագահական համակարգն է գործում: Կառավարությունն էլ, Դուման էլ փոխես՝ բան չի փոխվի։ Ամեն ինչ որոշում է Վլադիմիր Պուտինը։ Հնարավոր է՝ 1 տոկոսի չափով ներքին փոփոխություններ լինեն, բայց արտաքին, խոշոր հարցերում բան չի փոխվի։ Կառավարության փոփոխությունը Ռուսաստանի արտաքին քաղաքականության վրա չի ազդի, քանի որ այնտեղ շարունակում է ղեկավարել Վլադիմիր Պուտինը»,- ասաց Ստեփան Գրիգորյանը։

Նրա դիտարկմամբ՝ ՌԴ-ի սոցիալական վիճակը հիմա լավ չէ, հասարակության մեջ դժգոհություն կա Պուտինի և կառավարության վարած քաղաքականության նկատմամբ, և այս քայլով Պուտինը «զոհաբերում է» կառավարությանը։

«Վլադիմիր Պուտինի վարած քաղաքականության նկատմամբ դժգոհություն կա, և մեղավորությունը պետք է գցել մեկի վրա»,- ամփոփեց Ստեփան Գրիգորյանը:

Արմինե Ալոյան