Նիկոլ Փաշինյանից զատ գաղտնալսման գործով հարցաքննվել են նաև Արթուր Վանեցյանն ու Սասուն Խաչատրյանը

Հայտնի գաղտնալսումների գործով վարչապետ Նիկոլ Փաշինյանից զատ Քննչական կոմիտեում հարցաքննվել են նաև ԱԱԾ նախկին տնօրեն Արթուր Վանեցյանը և ՀՔԾ պետ Սասուն Խաչատրյանը:

Տեղեկությունը Factor.am-ի հետ զրույցում հաստատեց ՔԿ խոսնակ Նաիրա Հարությունյանը:

Մամուլի խոսնակը մեզ հետ զրույցում ասաց, որ Արթուր Վանեցյանի և Սասուն Խաչատրյանի հարցաքննությունները տեղի են ունեցել ավելի վաղ:

Հիշեցնենք, որ Նիկոլ Փաշինյանը հարցաքննվել էր այսօր առավոտյան: Ինչպես Արթուր Վանեցյանը, այնպես էլ Սասուն Խաչատրյանը հարցաքննվել են որպես վկա և ստացել են տուժողի կարգավիճակ: Նույն կարգավիճակն ունի նաև ՀՀ վարչապետ Նիկոլ Փաշինյանը:

Հիշեցնենք, որ ՔԿ-ն այսօր հայտարարություն էր տարածել, որում նշված է. «ՀՀ ՔԿ ՀԿԳ քննության գլխավոր վարչության վարույթում քննվում է 2018 թ. սեպտեմբերի 11-ին և դեկտեմբերի 05-ին համացանցում տարածված՝ ՀՀ վարչապետ Ն. Փաշինյանի և ՀՀ ԱԱԾ նախկին տնօրեն Ա. Վանեցյանի, ինչպես նաև ՀՀ ՀՔԾ պետ Ս. Խաչատրյանի և ՀՀ ԱԱԾ նախկին տնօրեն Ա. Վանեցյանի միջև տեղի ունեցած հեռախոսային խոսակցությունների գաղտնալսումների ձայնագրառումներում, հիշատակված պաշտոնատար անձանց կողմից իրենց պաշտոնեական լիազորություններն առերևույթ չարաշահելու դեպքի առթիվ հարուցված քրեական գործը, որի շրջանակներում քննության առարկա է հանդիսանում նաև Ռոբերտ Քոչարյանի և Յուրի Խաչատուրովի կալանավորման միջնորդությունները քննած դատավորների նկատմամբ արդարադատության իրականացնելիս միջամտելու հանգամանքը: Նշված քրեական գործով, որպես վկա ՀՀ վարչապետ Նիկոլ Փաշինյանը ներկայացել է ՀՀ Քննչական կոմիտեի ՀԿԳ քննության գլխավոր վարչություն և հարցաքննվել՝ դատարանների վրա հնարավոր միջամտությունների հանգամանքները պարզելու շուրջ: ՀՀ Քննչական կոմիտեի ՀԿԳ քննության գլխավոր վարչության վարույթում է քննվում նաև ԱԱԾ նախկին տնօրենի և ՀՔԾ պետի հեռախոսային խոսակցությունները ապօրինի գաղտնալսելու և համացանցով տարածելու դեպքի առթիվ ՀՀ քրեական օրենսգրքի 146-րդ հոդվածի 1-ին մասով, 254-րդ հոդվածի 3-րդ մասի 4-րդ կետով հարուցված և քննվող քրեական գործը, որի շրջանակներում ՀՀ վարչապետ Նիկոլ Փաշինյանը հարցաքննվել է որպես տուժող՝ ապօրինի գաղտնալսում և ձայնագրառումն իրականացնելու ու տեսանյութը համացանցում տարածելու արդյունքում իր իրավունքների և օրինական շահերի խախտման և գործի համար հետաքրքրություն ներկայացնող մի շարք այլ հանգամանքների շուրջ: Երկու հարցաքննությունները տևել են ընդհանուր 2 ժամ 35 րոպե»:

Նարեկ Կիրակոսյան